盯緊美匯

港股近來好有性格，內地市場滾熱辣，美杜指又連續創新高，但我地偏偏跟唔上外圍，甚至乎日升日跌，為周線圖留下一顆十字星。
後市點睇？嘉豪唔係先知，都想有人畀個答案。復活節假期前，我已經大手清晒所有MPF大中華基金，剩番少少歐股基金，都趁呢兩日歐羅處強勢清埋，連本帶利鎖起晒望調整。問題係我望你望大家望，個個都有資金在手時，則就算真正出現調整，幅度亦唔慌會大得去邊，結果可能又係上落市，有波幅無方向，等待出現其他外圍因素才走埋一邊。
附上一個從Chart of the Day「給」來的杜指歷史升勢圖，可以明顯見到今次係近代最長時間之牛市，現時幅度則尚未到達平均數。假使再加上美元匯率向下因素考慮，對海外(除幣值與美元掛鉤如港元者)資金而言，近年投資美股回報其實相當雞肋，最怕係一旦美匯掉頭轉強，而股市又無法保持於高位時，可能誘發大規模海外撤資行動，導致骨牌效應。