Sell in May and Walk Away

上述標題，有在五六月間恆指調頭跌三千點後，睇過下市面財經佬文章者，相信都見過不下三數十次，當時唔少人扮晒智者出來領功，猛讚自己點樣點樣普渡眾生，到頭來今日恆指發力創出新高，早前叫散戶 Sell in May 的「能」人，已經統統蒸發 Walk Away，猶如在齊聲高唱雷安那支名曲「舊夢不須記」。
周一港股隨日股調整，呢班喜歡扮演眾人皆醉我獨醒的「能」人，翌日不約而同全體發功疾呼：調整罅，調整罅，走得摩無鼻哥！打開報紙財經版，平均每兩段有一段預告跌市正式開動，仲多人捧場過昔日「精英大師」，偏偏這天恆指企穩腳回抽上萬九，雖然唔可以就此斷定調整不來，但這批「見升話升、遇跌唱跌」之羊群作者，何時才懂得獨立思考，真正寫出有見地的好分析呢？
實在講句，大市升跌與一般小股民未必很有關，大家又無炒期指國指，指數上落遠不如手中持股價位上落重要。你我都知道，於今所謂指數創新高，升勢主要集中幾隻重磅股身上，股價遠遜四月份高位者不知凡幾，成班「八股佬」猛「落釘」合唱調整，只不過係訂定張入場券，待真正大調整到來之日，重唱佢地首 Sell in May and Walk Away而已。
最後補多兩句，嘉豪曾經覺得王國英寫稿不隨波逐流，但近兩三個月幾乎日日呻呢樣歎個樣，既唔到題更唔到肉，無一篇內容令我感到有所裨益，聞說其已經自立門戶攪私人基金，寫稿水準反而大幅下降，何不索性收檔免衰收尾？