賣「旦」搵食難

夜闌人靜，摸上聯交所網頁睇業績公告，「超」完上周先施表行 (0444) 份中期，認真感覺到賣「旦」生意唔易做。
先施最出名係代理 Franck Muller ，幾年前闊太靚星幾乎逢 Ball 必戴，年中豪媽牛一，小弟都同豪妹夾份整左隻，係罕有新鮮出爐鋼帶款，標價三皮幾，嘉豪有第檔表行老友欏到貨，最後六折成交兩皮野落樓，豪媽即戴上手笑到合唔埋口。
其實捨得買貴價表者，總有多少人際網絡，唔會話「盲椿椿」衝入去掃貨。熟客仔就折頭必榨到盡，除左賣「勞」可以企硬多少之外，一般都係六折至六五折間，據表行老友告知，咪睇佢地銅鑼灣鋪千零尺地方，其實放左逾億銀靚表，做我單生意仔執幾舊水，仲要左試右試，直頭係蝕埋畀我。
回頭講番先施個筆，剩計香港業務，半年銷售額 1.73 億，比起上年 1.25 億，係就係多左 38.4% 生意，但利潤 51.6 M，比前 40.3 M 僅升 28%，睇清楚最大成本增加並唔係鋪租 ( 加唔夠 5% )，而係為對沖瑞郎風險，花左成 14.5 M，足足蠶食去五分一利潤，認真得人驚。呢個匯率問題相信全行都頭痛，事關名表入貨唔用瑞郎都用歐羅，可以話避無可避，遇上美金轉弱勢的話，更加係暈得一陣陣。
睇番集團展望，準備加強國內同澳門生意，其實國內買得起皮皮聲名表之士雖然唔少，但係佢地都唔信任國內店鋪，加上要搶最新款式，要入貨都寧願落香港幫襯。至於澳門街，無疑賭仔係手鬆多少，問題 Franck Muller 主要賣「潮」，五顏六色容乜易輸到七彩，實在唔容易搶走人地金、銀、鑽「潤」生意也！
講到尾，先施？咪預我。