Wise Buy, Stupid Sell!

咪睇嘉豪寫 Blog 似層層，其實畢生首次接觸買股票，係是年 3 月 3 日，「三三不盡」喎，應該算係好開端。
我一直好有系統記低晒所有買賣記錄，八個月下來，無疑有多少斬穫，不過睇番條數，最大受益人其實係乜都無做過的 BEA ，事關呢條新仔進出頻密，縱使每次落注金額非大，中間人落袋數字早便超過五位數。
賺左錢醒多少「埋便」係閒事，不過我昔日呢種參與方式，明顯係唔及格行為，為長遠計，一定要痛定思痛速速戒除。
睇番嘉豪所持股票，其實不乏好潛質貨色，問題係無耐性或者唔夠自信心，大部分執多少，或甚至要蝕一點離場，莫講話學畢菲特長線持有，就算成功中短線持有者亦不多。特別在以下列出部分類似之Wise Buy, Stupid Sell個案，好作日後警剔。

神州資訊 (8206) 3/3
買入價 : $0.63 -- 賣出價 : $1樓下 -- 現價 : 約 $3.5
呢隻係嘉豪初次買入股仔，純粹信老友分析有電玩概念，膽粗粗下海之作，三幾下手勢賺到五成利潤，老實講無話對或錯，但自始明白概念呢樣野可以幾無譜。

天津創業 (1065) 6/4起
買入價 : $2 / $2.2 / $1.65 / $1.7 -- 賣出價 : 平均 $2 -- 現價 : 約 $2.4
此股「食」正十一．五概念，嘉豪自己做足前期功課至開始買入，就算因Ａ股股改後大幅插水，仍有信心低位增持，甚至學人畀貼士，囑身邊股場老友吼實。結果呢？咪忍唔住手囉，九月尾開始逐漸減持，埋單所執有限，其實現時才真正踏入爬升期，我卻已經講分手。

國泰航空 (0293) 9/5
買入價 : $13.65 -- 賣出價 : $13.25 -- 現價 : 約 $18
當時國泰股價一直被高油價壓實，嘉豪心態人棄我取買之，一心打算長線持有，睇怕總有翻身之日，也相信 08 奧運概念必利國泰前景，應遠比管理混亂之國內航股有潛能。事實最初並無睇錯，但隨住時間流逝，見佢係咁吽落去，捱到六月底終放手換碼，跟住就眼白白望實佢每日升多少，惟有問句蒼天：點解唔懂得堅持？

其實還有 340 , 535 , 585 , 3322等多個可歌可泣故事，都係無謂數落去矣！