紅人反口 倉主捉弄

講單馬圈紅人揀座騎，遭倉主捉弄古仔娛賓。
話說呢個周三有隻低班貨色，上次由紅人助陣一擊即中，早早講好繼續攜手望食多劑，佢亦都好似一條心咁晨操摸住，點知正式報名前紅人故態復萌，臨時臨急又欲推庄。
紅人自知理虧，電話打畀倉主副手，隱隱晦晦謂早有另一倉主邀騎，但係就唔打算出「王牌」報名，換言之未必有機會列正選，所以只係買個保險講低一聲，唔一定會效力別駒者。
倉主收到副手匯報，挑通眼眉知道紅人又準備出爾反爾，不過客大欺店，早被放慣了飛機，而且搵過第個幫手都非難事也！只是始終有多少心心不忿，諗到計仔捉弄一下紅人。
倉主立即致電紅人，謂既然別駒不打「王牌」，那麼成正選機會應該甚渺茫，所以唔打算搵人接手，假使人地真係咁好運，咪放紅人做個人情咯；不過佢額外補充一句，謂假使人地隻馬出「王牌」，咁就唔同計法咯，事關已經準備好通知馬主，紅人會繼續執韁。
紅人聽罷上述一番話，詐詐諦諦謂要查清楚別人意向，隔無耐終於致電倉主 say sorry ，話自己誤會在先，人地原來係打「王牌」報名，所以多數幫唔到手云云，倉主聽完笑到碌地，不過當然最後照放人也！