逆耳忠言

一口氣睇晒方卓如《跟紅頂白》、《易容財技》同《企管眉批》，每本盛惠$68，計一計數兩舊水埋單。假如合成一冊售賣，都咪話唔肉刺，唔知邊位高人諗到斬件式逐忽「閹」高撟，抵讚！
雖屬舊作輯錄，又確係睇得嘉豪好過癮，事關方君別樹一幟用「腳」行文，一味踢穿上市公司古靈精怪行徑，比諸教人炒股更具參考價值；未學贏、先防輸，知道如何保住本錢命仔，那怕等不到賺錢機會？
昔日替《蘋果》開荒，秉承《壹》仔傳統，每天各部門阿頭必然齊集「鋤」報，「鋤」報者，輪流指出對別版批評是也；記得嘉豪最喜歡「鋤」財經版，事關當時甚熱愛炒外匯孖展，呢瓣操作比諸該版編輯更加熟悉也。另外還每星期設focus group，畀埋車馬費拉街外讀者加入「鋤」報行列，可見批評確實有價，更加係改革進步之最佳助力。
嘉豪經《蘋果》洗禮後，深切體會到批評比讚頌珍貴之道理，只可惜知心朋友一隻手數晒有餘，能聽到逆耳忠言機會不多，真渴望有位「無間道」臥底代為收風，助我知道別人眼中缺點所在。