做好呢份工

股市旺時，投資收入隨時勝過打工，有人心思思轉做全職炒友，唔係稀奇事。
坊間財經評論，可能自覺傳媒應有社會責任，所以從來唔會認同此種想法。不過嘉豪就唔覺得全職炒股有乜問題，基金經理唔需要額頭鑿字，無理由係要讀過經濟會計有張沙紙，或者於證券行撈過十年八載，方叫做夠資格靠投資搵吃。
問題係，全職炒股唔代表日日走上證券行，聽埋聽埋D路邊社消息，或者望住個二十大升幅執幾格；呢種只係塘邊鶴行為，一個唔覺意突然飛隻大麻鷹來搵食，隨時連渣都無埋。正如馬場也養活了一批專業賭客，但佢地一定唔會淨係靠聽圈中人或講馬佬貼士落注。
我認為，只要係真材實料做足功課，夠EQ兼懂得適當分配注碼，再加上具獨立思考能力者，若有足夠兩年儲糧，另加約五倍現時年薪做子彈，一樣可以做好全職炒友呢份工。事關有數得計，年投資回報達20%以上，便已經相等於打工收入，假使現職行業前景有限，人工又加得少，其實那怕一試？