再同意馬(585) 計數

上周五忍者龜(TMNT) 慈善首映，嘉豪有幸先睹為快。論到製作水平，我覺得絕對值國際級，套片似乎被盡量當作技考展覽，每樣元素放多少，務求吸引到荷李活投資者認同，至於劇情同角色塑造，好多位都未有去到盡，以play safe為主。畀我輩中年人睇，其實係對牛彈琴，至於後生仔係咪喜歡，就要待本周公映後睇下反應。
海外則於23日正式公映，美國有多達3,110間戲院，陣容相當鼎盛，而且口碑普遍唔錯，據當地網頁初步估計，三天票房累積已達US$25,450,000，假使能夠保持氣勢，收二億並非奇事。對比此片製作費US$34M，有望獲得豐厚利潤。
《經濟》去周六報道，意馬高層透露分帳以分層方式計算，如下：
一．分銷及電影院先取45-53%；
二．發行商華納兄弟及另一公司Weinstein，共取餘額30-35%(即約總收入15-18%)；
三．最後扣除廣告開支US$35M。
上述細節無錯的話，即意馬約可分到總票房30%減廣告開支US$35M。有了這條公式，電影收入便唔難計，事關製作費早於「半賣斷」給華納及Weinstein時收回，即相當於無本生利，多賣多賺。
先計打和點，即完全抵銷US$35M廣告開支之票房，答案大概係US$120M；假使中中地億半票房，意馬將袋US$10M；二億則袋US$25M，相等於二億港紙。
上述僅屬美國電影分帳，尚未計其他海外及本港收入，還有玩具、電子遊戲，生產商皆要付出版權費與分帳給意馬，成條數計計埋埋，隨時帶來兩億半以上收入。
就當佢只得兩億純利，以意馬現才正式起步，而且有條件吸納國際資金垂青，30倍P/E唔算過分，換言之現時六十億市值剛剛好，無乜溢價水份在內。至於係唔係仲有下橛升幅可博，要視乎閣下點諗，以及票房係咪可能帶來更大驚喜矣！
補記：根據美國Yahoo每天票房統計，TMNT踏進次周收入大幅轉弱，相信經復活節最後衝刺後，大致可估計到最後收入，不過殊難樂觀了。