三條「7」

是日恆指跌了 777 點，假如在賭場拉老虎機，見三條「7」當然笑甩棚牙，可惜呢三個紅「7」，係出現在大利市機。
由 1 月 24日恆指見 20,971，至是日最低 18,659，下跌了2,312點或 11.02%，前後僅二十七個交易天，且基本上係濃縮在近五個交易天完成，速度與力度皆非同小可。再觀港收市後日圓繼續向 115挑戰，這場 carry trader 平倉風暴，相信尚未到煞車掉頭時候。
面對如斯驚嚇場面，嘉豪見持股反正仍處安全區域，所以採取少做少錯策略，剩係望住帳面利潤打了個大折頭。最慶幸係兩星期前懂得將大部分 MPF基金變現，如今可以從低 10%價格重新作分段吸納，計劃每低 4% 便「浸」進五分一資金，變相有望賺多逾兩成，計落都相差幾萬銀架。
恆指到了此地步，人人睇住係咪守得穩 18,300，相信兩三日間便會測試此水平，夠膽汁兼肯睇中線者，大可渣定銀紙博撈底，再唔係，17,700都應該守得住卦。所謂有危便有機，呢點嘉豪唔會懷疑。