針對

某年某月某天，節目中借題發揮了幾句。
同年同月翌天，碰上被借題發揮的源頭，黑面，問嘉豪何以針對？
我同圈中人近乎絕緣，交往可免則免，就算住正某練馬師隔壁，更屬年少大家未入行便認識，也僅偶爾出入碰面時寒喧兩句。事關好早明白這是片功利之地，圈中人只適宜作不涉利益的普通朋友，深交可免則免。
沒有愛自然沒有恨，更加不可能有針對人之心。奈何言者怎樣無心，也難防聽者有意，誇獎說話一千句唔嫌多，調轉頭提一個半個相反意見，對方十居其九立即對號入坐，認定你存心針對。
幾佩服有Ｄ行家面面俱圓，從來都係「四萬」咁口，行走江湖獨用一套隱惡揚善功夫，可惜嘉豪天資低學極唔上手，加上又主持了賽後節目一段日子，每年七十八回計，加加埋埋都應該唔少過五百集，當佢平均每兩集，便唔覺意「針對」了一位對象，大大話話起碼開罪了眾圈中人二百五十次，睇落都係無機會返轉頭矣。
惟今之計，除了繼續我行我素，久不久遇人興師問罪，大概別無選擇！