超大現代(682)七分鐘插水

既屬基金愛股，又係散戶炒上落理想對象之超大現代 (682) ，是日收市前示範七分鐘極速插水奇技。
自半年前入股中國礦務 (340) 惹來惠理減持，嘉豪開始注意超大，逐漸發覺此國家欽點企業乃炒 range 佳選，有段時間於 $4 至 $5 來回數轉，踏進○七年則徘徊 $5 至 $6 之間，一副升定等靚靚業績姿態。
近周股市大震盪，嘉豪便開始留意有否機會上車，但超大所受壓力不算強，是日從 $5.25 開市，至三時多仍處 $4.8 樓上，料不到於收市前七分鐘，由一注「半球」沽盤帶動大跌，短時間內「球零」成交，竟然插水掃板至 $4 方止，醒目掛盤於「齊頭」位之十餘萬股買盤，一個唔覺得執到筍野。
唔係話四蚊雞超大無得輸，但七倍 P/E 而預計每股帳面淨值逾三皮，縱使捱價都有毫幾子息收，另加時不時獲基金增持，實在睇唔出有多少風險。
假使聽朝開市有 $4.2 以下，嘉豪實行飛身撲入先買多少，另掛低二三十格博大霧，望佢又有類似斬倉式沽盤再現江湖。

補記：翌日睇《信報》，內頁有段短文寫超大股價勁插水，想當然見低話低，又話乜又話七，彈到隻股一文不值，完全無去查下發生乜野事，次日股價即刻回復正常企番五皮樓上，抵畀人打一巴！