走貨？撈貨？

港股經歷了驚濤駭浪的一周，去周五歐美股市除倫敦外也續跌，大家心裡難免有一問：大市是否已經跌定？
嘉豪亦平凡人一個，無疑手中所持三四線股滾存利潤豐厚，但從高峰下調了已逾一成，免不了也會反覆思量：應否先 Cash Out 一下，避完鋒頭等跌低多少再撈貨，豈不更加穩陣？
問題係我唔覺得股票市場客觀形勢大幅改變，美國經濟縱使放緩，亦唔見到衰退跡象，何況格老一番話之後，轉個頭聯儲局成員即刻走出來唱對台，擺明大選年前要「保家衛國」，唔想投資市場有乜頭暈身罄。至於港股賴以發功的國內經濟，熱度亦未有退減跡象，加上奧運概念，夢境不會消失得如斯快速。
何況給我選擇的話，也喜歡像去周般三兩下手勢跌一大橛，因為最怕係每個星期跌二三百點，那種陰乾手法唔嚇親都悶親，如今起碼試過個承接力，兼且膽汁少一點者已經變身塘邊鶴，只要唔係壞消息接踵出現，攬貨尚存者反正大多有一定利潤在手，唔見得會不計價離場。
至於係咪撈貨，純粹睇你乜野心態，走短線者未必係理想時機，但中長線有實力股，則漸屆價位吸引時候，像嘉豪之前品題之筆克遠東 (752) 同美聯物業 (1200) ，假使再下調 3% 至 5%，絕對就係出手之良機。
嘉豪還留意到一點，係去周四及周五國指類股成交額大減，以現時彼等價位較去年底時大幅扳高計，實質出貨量 (股數) 根本唔係咁高，換言之已經賣得七七八八；反而係恆指股類交易額仍高，短期沽壓料比前者為高。