股馬享通

香港地當馬主，一季養馬費閒閒地四十粒，買隻愛駒開口埋口七位數字，家陣港元隨美金弱勢，入貨更加係愈來愈貴，絕非等閒之輩所能參與。

上市公司主席，同樣係身分象徵，尤其今時大市興旺、資金充斥，唔好計你做乜野生意，盤數係賺係蝕，單係個「殼」已經價值逾億，而且求其塞個變身概念，唔理係買兩張濠江賭桌權益，抑或「山卡拉」爛鬼煤礦，都可以炒高搵基金入股，三幾下手勢袋佢一兩億現金。

嘉豪無時間整理上市公司主席兼馬主名單，但係隱隱然覺得，股價同佢地名下馬表現，咁「翹」都有Ｄ關連。像意馬(585) 大股東寶樹系，去季頭馬拉到手軟，隻股票亦好似坐火箭咁標升(注：其實唔少報章股評攪錯升幅，話佢由個零發力，忽略了曾經一拆五，計準應該係兩三粒「神」起步)，而近期隻陸氏(366)大熱，五月初「不老英雄」便打開勝利之門。

是日見官永義單內幕交易官司上訢成功，莫非意味名下「馬中神駒」就快入凱旋門？