南瓜真好野

記得十多年前成世仔首度踏足新西蘭，其中一頓西式海鮮美食，晚餐甜品係南瓜批，當時係嘉豪第一次「親口」接觸南瓜，食落覺得呢種番鬼佬蔬果味道奇怪，無怪被用作萬聖節裝飾。
近兩三年卻驚見南瓜成功「登陸」各大小食肆，尤其飯後甜品，不時以此為主，更有索價特高的日本溫室南瓜，於我而言味道咁怪o既野，竟然能夠成功打開東方人市場，負責推廣之機構當記一功。
其實世界上有唔少負責為產品打開市場之「花錢」機構，燒完大堆銀紙，最後係咪能夠得到回報，最初根本無人夠膽寫包單。記得嘉豪有個中學同窗死黨，早年於負責推廣羊毛之國際羊毛局 (IWS) 工作，即係大家經常可以在毛衣標籤中見到，用三舊「冷」砌成「品」字o個間公司，當時仲未係咁多人跑大陸，佢已經要頻密往返內地，到各地針織廠攪關係同交流技術矣。
側聞南非賽馬推廣局正籌備在港設立正式聯絡處，以圖在這個相當「使得起錢」的地方分一杯羹，能否成功，答案當要等待三五七年後才揭盅。