勞氏環保(309)賣唔落手

呢隻股票，嘉豪買完又買，幾個月來升左幾個開，由$0.61配股開始買到近$2，如今雖然穿上$3樓上，但係愈來愈唔想放，尤其據知過左舊曆新年便會動工起兩間廠，換言之好快可以帶基金參觀，屆時大有機會再升多浸。

睇畢飛特選股條件，呢件野中唔晒都有七八成。

第一係業務簡單：事關處理醫療廢料主幹係靠一部外國引入機器，已經在美，加，印度使用，而且據我所知印度有多達二百個點用緊，換言之係平靚正，維修保養費用亦好低。

第二係管理簡單：處理費用全國劃一，兼且由政府負責從醫院收費，醫院則早在病人付診金時收費，每個病人所負擔僅一個幾毫。

第三係獨家經營：此技術為國內現今唯一合規格環保處理程序，而國家環保局規定每個城市只准建一所同類廠房，而清大德人(勞氏擁55%)與每個城市簽訂二十年獨家經營合約。

第四係潛力豐厚：第一期已簽定8個城市，翌年第二期加添22個城市，然後繼續以幾何級數擴散，目標係五年內增至200個城市。

第五係現金流強勁：據估計每個廠房約投資1000萬元，勞氏佔55%權益將有三成多純利。首年8間廠即3,000萬，當一般環保項目20倍P/E計，309市值增添6億，即每股值$1.70，投產次年增長至30城市，市值便增長至23億，即股價在$6以上；假使真係有日服務200個城市，就係$40股票。

上述內容係收錄自1月22日《經濟》，2月9日《信報》同埋聯交所公布，唔好當係嘉豪作料或亂咁收風。

最後你會問，風險在那裡？

一．假大空，有關技術完全係吹水。不過睇落唔似，事關嘉豪到過加拿大該技術擁有者網頁睇過，確證呢項技術已經採用經年。

二．被競爭者搶奪市場。唔能夠排除可能性，不過國內批文唔係咁容易及咁快手攪掂，有競爭都可能係幾年後之事。

三．利潤被誇大。按聯交所公布，勞氏環保與清大德人合作協議中，包括有盈利保證條文，換言之機會又係唔大。

看罷上述原因，大家應該會明白嘉豪唔捨得賣心情。設想某天此股真係值$40，當佢年息率只有 2.5%，不亦每年有 $1 股息落袋？