2007/10/31

唔敢沽

近期每當恆指創新高，總會激起指數認沽證交投量，但今勻由30,000關前上上落落，以至升到31,500新高，認沽證成交卻依然低企，似乎連最包拗頸者也告棄械投降，唔再死守淡友堡壘。

常言道，當市場最樂觀的時候，往往就是牛市將盡，因為連最後一個買家都掏了腰包入貨，咁仲有邊個會以更高價去接棒？

日期 恆指 指數認購($K) 指數認沽($K)
22/10 28,373.63 $5,816,833 $2,529,813
23/10 29,376.86 $5,772,816 $2,734,492
24/10 29,333.53 $6,236,371 $3,684,230
25/10 29,854.49 $6,861,157 $2,997,343
26/10 30,405.22 $5,468,705 $2,123,313
29/10 31,586.90 $2,521,933 $2,122,368
30/10 31,638.22 $1,836,236 $2,548,055
發佈者： Tim 於 10/31/2007 03:34:00 上午

8 則留言:

匿名 說...

老人家在港股開市時間正在工作中，無暇看著大利市機，故此除了買賣正股外，暫不想沾手任何衍生工具，看到嘉豪兄的call put 經驗，十分羡慕，但我仍未作任何鑽研。
最近大部人在等候大調整來臨，望到頸都長，其實，我一直唔明那班人能有本事製造升跌市〔我指沒有大事發生的日子〕，現在居然有人指出12月7日會出現大跌市，不知是否求神問卜或紫微斗數測出來。之前的專家或占卜家全部跌晒眼鏡......。
請問嘉豪兄：除了認沽證外，還有那些藍籌股未郁／少郁〔大笨象〕，它們是否可成為避難所？

2:51 上午
匿名 說...

上一個及此一個「匿名」皆是「老人家」，因為試了多次post不成功，故嘗試用「Anonymous」便立即OK.....

2:55 上午
Tim 說...

假如係跌市來臨，避難所都係避唔過下跌命運者。我覺得既然係存心等大調整，就唔應該受到狂炒市況吸引，反正到將來大把便宜貨的話，揀d好股隨時賺佢兩三個開，又使乜貪圖眼前兩三成利潤?

其實小弟對住部機炒牛熊證即日鮮，有賺都只係雞碎咁多，無乜值得羨慕地方。其實若認定短期內跌市會來臨，少少地買一兩手熊證或認沽輪看門口，輸晒幾千，博中過萬，都一樣能夠賺錢者，那時便唔需要理會單日上上落落幾百點波幅，同意否？

11:52 上午
匿名 說...

老人家唔明熊證或認沽輪之分別?
輸晒幾千，博中過萬，咁即係有幾多賠率呢？嘉兄的建議是只宜短期，是否指兩三個禮拜？

6:34 上午
Tim 說...

熊證同認沽輪之異同略複雜，小弟可以嘗試下解釋，但都敢話自己實對晒。

熊證有回收機制，到價便玩完，或有雞碎咁多剩餘價值畀返你；譬如瑞銀熊#6233，回收價恆指32,400點，即係話你買入之後，只要恆指曾經有一秒鐘touch過32,400，"合約"就宣告完畢，咁縱使其後跌到得番28,000點，都唔關你事。

窩輪都有行使價，但理論上無論恆指幾多點，只要一日未到期，佢都有本身價值，不過若果已經相當價外，則都係雞碎價錢；譬如11月底到期，行使價21,400點的德銀輪#2427，八月中"V彈"前曾經值$0.223，如今則跌到$0.01，即輸了九成半本金了。

最大分別還有兩者槓杆比率變化，假如朝理想方向走(即恆指下跌)，熊證槓杆會因為逐漸離開回收價而愈來愈低，認沽輪則較複雜，要睇埋你入市時引伸波幅。

相同處係大家都有溢價，等於係你同發行商借錢要收息，呢樣就睇到期日有幾耐，年期愈長當然溢價愈高了。

我覺得以目前大市波動環境，買輪引伸太高，短紗的話，揀熊證比較化算，穩陣D就選荷銀#6239，恆指35,000點回收，唔係咁容易死，下年七月底至到期，現價$0.51，買一手$5,100，假使恆指跌20%，都應該有一個開以上利潤了。當然若想博更大利潤，則要揀比較貼價者，問題係回收風險便會較大。

睇遠D，就不妨選D極度價外兼中年期輪，譬如三月底25,000點左右行使者，市場有唔少選擇，都唔使一千銀買到一手，博佢三幾個月內出現一次大震盪，幾個開返來有乜難?

9:55 上午
匿名 說...

老人家多謝嘉豪兄指導。

4:45 上午
Tim 說...

哈哈，講到指導咁嚴重。你我都係股海中一根小浮枝，但求唔好被沖左去大西洋矣！老實講，唔係同兄討論開，都唔發現遠期認沽輪咁平，可惜正考慮是否入番幾手當保險時，個市已經插左下來，否則呢轉跌成三千點已經相當和味。

11:54 上午
Tim 說...

有左今次體會，我覺得若然來年四五月，港股因奧運效應以至直通車翻生再處巔峰，大可再度採取此策略，必須記存！

11:58 上午

發佈留言

訂閱： 發佈留言 (Atom)