愈炒愈癲、愈癲愈炒

快口估中，上周四恆指出現單日「W」走勢，應屬將挾穿30,000兼再爆一段訊號，這天果然衝到31,500，而且幾乎全日無回頭，淡友欲「打個折頭」認輸的機會都無。

大市「愈炒愈癲、愈癲愈炒」，無人能夠預言能夠升到那裡、升到幾時，其實大家都有共識，明白終會掉頭大跌，問題係假如再升多兩三個月、甚至半年，咁早落車除了錯失賺錢機會，日日對住個火熱升市，心理亦好難平衡，所以惟有繼續摸住石頭過河，寄望他日縱使未能極速跳車，也能夠賺頭蝕尾執多少。

眼前就係FED議息，上回減夠半厘，為市場帶來驚喜，結果除美元外瓣瓣皆升，今次大家估「一個骨」，應該無乜走雞，屆時係咪會先出貨，調整下之後，待遲Ｄ炒12月11日再減？

無論如何，嘉豪覺得都係時候為ＭＰＦ減減磅，畢竟由上次27,500點入貨，已經升左約15%，所以繼29,000點時調走50%後，是日收市前再減三成，希望下月初有機會調整返落10天線方重新「溝」入。