矛盾

近期集中玩「短聚」，今日買下廣深鐵路(525)，聽日炒下湖南有色(2626)，錢就賺唔得多，勝在唔洗「坐」貨輕輕鬆鬆，兼且叫做保持住同個市場接觸。

持續一千點八百點咁樣喪升，傻仔都知道唔可能長久，問題係齋等亦非理想辦法，事關真係怕佢一日鋪天蓋地沽下來後，個市就此展開漫長尋底之旅，屆時縱有平貨執都未必有用，蓋今日低價可能係明日高價，撈得到也未必好。

睇返中港大形勢，則唔覺得個市會在短期內掉頭，事關好早已經講過，國策必是「穩定壓倒一切」。上便通脹問題嚴重，民間靠炒股炒樓賺快錢頂住，當然唔會太多聲氣，假使資產突然出現風暴，廣大同胞身家大縮水，好容易會惹起民怨民憤，發起窮惡來隨時影響及奧運盛事，呢個鑊冇人可以擔當得起。

至於這邊廂香江福地，近年靠阿爺不斷輸送利益，總算大幅減輕了金融風暴後的創傷，表面經濟更勝殖民地時代外，「上街」事件也愈見輕微，這個世上獨有之「一國兩制」示範作，係要來畀國際同台灣睇，偉大祖國如何有能耐，所以又係唔能夠畀佢衰相者。

上述諗法其實兩相矛盾，對分析中短期股市走勢顯然無幫助，但這正是刻下小弟心目中感覺，唔知大家又點睇？