反思

港股升到現水平，郁下手就上落一千幾百點，身在如斯風高浪急環境，對嘉豪一類初哥散戶來講，簡直可以話係ＥＱ大測試。

小弟成日諗，假使港股就快見頂，按理唔需要承受呢段煎敖日子架，賣晒手中持股，抱住大筆現金守株待兔，等股市有咁低有咁殘至吸過，坐佢三五七年，使驚唔賺幾個開返來？

不過我又諗，邊個保證股市必會跌到又低又殘？假如恆指就此升到三萬、三萬五，甚至係五萬點(發開口夢)，第日調整都不過落返兩萬五，咁係咪就此同市場講拜拜，唔再投入呢個金錢遊戲？

或者大家會覺得，第二個想法係嘉豪過分樂觀，甚至乎屬天方夜譚。股市升高之後，總係唔可能抗得住地心吸力者，因為歷史告訢我們，從來不會有只升不趺的股市，行完牛市三期，接住就係漫長熊市來臨，所以在現時值博率有限之下，唔識得去持盈保泰，轉個頭便難免受到教訓。

但想深一層，歷史真係「必然」會重覆嗎？我只係想提出一點，就連張五常大教授，都指出目前中國發展的速度與成果，根本屬「史無前例」。引伸下來，我認為港股在阿爺特別照顧背景之下，若突破了慣常格局，弄出一個獨有的「牛四」、「牛五」，也不見得太陽便要從西邊升起。

寫呢篇野，並非代表在下極端睇好後市，只是唔想人云亦云，刻意提出一點反思而已。