日圓挺上

美元兌日圓近周走勢幾嚇人，一周前還好像要衝向120，接住卻連日插水，是日縱能守住113未破，日線圖MACD仍是「雙熊」，估計三數日間仍會再試低位。澳元交差盤更是形勢險峻，由107直墮至穿了100大位，寫此文時叫做勉強頂住，但這次升浪實際是從上次港股「V彈」之際從86.5起步，假如調整50%，起碼還要多跌300點子。

下周FED議息，市場估有機會再減0.25%，換言之美、日息差很大機會前後縮減0.75%，基金閒閒地借一百幾十球套息，冇得唔計呢條息差數，套利交易先拆倉避風頭真係好正常，畢竟呢兩個月以來，日圓匯價兌美元冇乜點曳，假使輸埋匯率就好大鑊。

睇番港股，是日一如嘉豪所料先有「浸」後抽反彈，亦算準僅得「一招了」，食完餐午飯即刻腳軟，2:40便見五分鐘圖MACD「雙熊」，讓小弟先「牛」後「熊」賺足全程，靜候至收市前最後一分鐘方平倉離場。

之前提出過港股「V彈」後一直未嘗連跌三日，但這趟遇上外圍日圓拆倉壓力，真係唔排除要破破例，就算仍具創新高機會，仍隨時要先下試10月初27,000關口支持，想撈貨者尚應忍一忍，或者不妨考慮暫時純用技術分析炒指數上落，以至小注吼下部分開始靜極思動之三、四線。