Botox挺股

港府狂掃港交所(388)，令港股是日猶如注射了Botox，尾市完全收服跌幅，無視日、韓瀉逾2%弱勢，港交所當然更加氣勢如虹，直向兩百大關步步進迫。

嘉豪是日又上了一課，就是只要腦筋動得比別人快，市場無時無刻都提供輕易賺錢機會。唔好誤會小弟想晒命，讚自己睇準開市便需賣走熊證套利，反而屬一番自責警剔，因竟然懵到待開市後，方醒起應買入景福(280)追落後，蓋單計其所持有港交所股份，市值已經近三億元，水漲船高之下，又豈有不大升之理？惜當時景福已經搶至$1.3，假使早作準備在競價時段$1.15買入，以$1.44收市價計，單日升幅高達25%，簡直可視為港府送給市民最大厚禮，可惜在下就是反應遲鈍了30分鐘，就此見財化水。

從是日表現可見，港股實在水頭充足，縱使諸般條件不利，做淡始終難有生存空間，怕買貴者，要有準備他日隨時後悔難返；不過「911」正在眼前，下周又是中美議息，嘉豪始終覺得唔爭在等埋落去。