大戶睇牌

呢兩日冇美股影響之下，港股變成自己炒，少少受日股左右，更多受深滬影響，愈來愈失去本身性格。

北水直通車「閂住」唔(未)放行，按常理個市應該要回吐，事實上周一競價時段恆期一度跌近400點，但內地股市續闖新高之下，到最後跌幅幾乎消失貽盡。可見大戶要托住個市時，求祈搵個「藉口」便可以入貨，是否按牌理絕非關鍵。

大家未必留意到，由去周一(27日)計起，六天成交之中，有五天指數認沽輪成交金額比認購輪多，僅去周三恆指調整至22,686當日例外，而昨天認沽輪成交金額，更升至認購輪的1.84倍，可見恆指到了現時高位，短線睇淡者比睇好者眾。

問題卻是股市升降絕非「一人一票」決定，窩輪既屬散戶蜜糖(毒藥？)，大戶縱使未能完全操控市場走勢，但肯定有足夠能力從中搞點小動作，見散戶較多押注沽輪，他便會想辦法托住個市，慢慢折磨考你耐性，隨時到你終於頂唔順「認錯」，改企過好友陣營之時，便放手交出火棒。

唔係話港股短期內必然下跌，但到了此位仍叫人放心買、炒落後，是財經演員為「唱好」本行的指定動作而已。現價追港股，除了北水直通車情況未明朗外，尚要防內地突然出招打壓深滬股熱，試想像假若Ａ股掉頭，不就拉近了與Ｈ差價？那時大戶沽定期指後掟貨，大家要識得急轉身至好。

際此環境，散戶短線最佳策略，應該係乜都唔好做；假如做了，不論睇好睇淡，都應該堅持下去，除非已經到了心目中止蝕位「打耙」。最怕是一時好一時淡，結果變成左一巴右一巴。