無符

上周末提過，估計周三會展開另一升浪，唔敢渣貨者要有心理準備追貴貨。可惜估中冇獎，事關除了ＭＰＦ剩低一成中華威力，以及兩隻Hold住逾年的中長線細股外，嘉豪並未作出任何其他吸貨行動，畢竟小弟都係以畢菲特投資金句「先求唔蝕」為座右銘，明知前面風險大，博少一鋪唔使死。

眨下眼暴升了一千點，大股冇得買，搵落後股唔知市場幾時至炒到，呢兩日結果又係得個睇字。估計境況與我相若之散戶唔會少，或者大家都希望等過幾日個市慢慢調整，回番一千點固佳、就算五百點都唔錯，屆時重新上車，應該會穩陣Ｄ。

不過嘉豪從來唔相信個市會稍跌「益」你買，就算係回吐，頂多應該二、三百點，否則跌完一千仲會有「額外」一千，讓後來者又嚐「坐艇」滋味。此所以，進取者現階段仍然係要「買」，不過當然需放輕注碼；至於穩陣派，則只宜耐心等下去，或者像小弟般炒下即日鮮，當作維持對市場之觸覺。