數碼港

偷得浮生半日閒，趁住到金鐘辦完點事，同Better Half走去數碼港食飯睇戲。
先介紹套無得頂o既好戲，就係由安東尼鶴斯主演之《瞞天殺局》(Fracture)，內容講述戴綠帽之安東尼如何精心佈局合法殺妻，套戲兩個鐘頭一氣呵成，無悶場且橋段毫不複雜，絕對值得花條「紅衫魚」拍拖捧場；至於小弟，由於係周二消費，兩張飛只花了八十大元，更加屬抵上加抵。
講番數碼港，可以話係港島有車人士睇戲必然之選，時鐘平到十二皮，免費泊車更低到消費五十蚊就有兩個鐘，唔消費用兩張戲飛都攪掂，問題係個商場靜到鬼影無隻，除非你貪佢全場Wi-Fi任上，托部Notebook去過下Cyber癮，或者都算係一條自娛良方者。計我話，鄰近如華富村居民，就好應該好好善用下呢處免費資源，既慳荷包又幫人地製造下熱鬧場面，仲唔係雙贏方案？