機動遊樂場

細價股勁炒，每日升幅榜入圍者，股價動輒彈高三幾成，散戶當然樂於擔當大白鯊身旁之間條魚，但求執頭執尾搵餐食。

嘉豪認識一些全職炒手，袋中子彈充裕、耳聽八面風聲，趁此狂熱階段，每日衝入殺出數十回，平均賺幾「格」已經抵得住一個中層管理人幾個月薪酬。不過佢地行蹤飄忽無定，上午炒東家、下晝攻西家，跟風客一個唔覺意落唔切車，隨時就此被綁。

最現成半隻焦煤股(因為都掂好多瓣，唔能夠算一隻)，上日一「吹雞」升幅逾五成，尾市氣勢更加勁到嚇壞人，豈知一覺睡醒，原來成班炒鬼已經蟬曳別枝，好似天馬艦個機動遊樂場咁，搬左竇唔知幾時又搭過，可憐膽粗粗高價撲入之輩，第朝唔放低兩三成都咪洗旨意落車，惟有擘大喉嚨高唱「何日君再來」。

是日國內突然上調印花稅至0.3%，等同香港0.004%之75倍，若果係即日鮮炒客，呢條數都幾襟計，無怪震盪力遠比上回加息為大，不過對於真正有意作中長線吸納者，出入市成本略增，其實並非關鍵考慮因素，看來一旦市況稍見喘定，反而提供了一個較佳入市機會。