咁都算濠賭？

睇左單市場傳聞，謂思拓通訊(8171)正與澳門博彩公司洽商，有意透過手機提供網上博彩服務，並計劃初步推出「番攤」賭博項目。
澳門街得人口六十餘萬，除卻少部分賭業工作人士，基本上自幼便明白唔好走入「雀籠」，否則幾多身家都唔夠進貢，此所以本地人佔賭博收入份額，肯定係微乎其微。
連娛樂場都唔慌做到(亦未必想做)澳門人生意，試問就算有手機博彩，又可以搵到乜野甜頭？唔好忘記澳門街雖謂人均收入大幅上升，但若非從事賭業工作，差額其實一大橛，普通小市民又豈能支持企業盈利？
不過市場炒作從來只需要搵個藉口，咁樣吹一吹，沾住「濠賭」之光，竟然都能夠升高兩三倍，簡直應晒8號仔昔日口號：「只要有夢想，凡事可成真！」
假使由嘉豪做師爺獻計，呢單野其實應該咁樣玩：實行簽齊晒中、港、澳電訊商，提供免費電話博彩遊戲，獎品就係濠江泥碼，咁樣就可以培養群眾對賭博興趣，變相成為推廣宣傳橋樑，屆時反過來可向各大娛樂場收銀之餘，更順便撈埋電話訂酒店船票車飛服務，得益隨時拍得住賭廳中介人，仲使乜去吼手電博彩雞碎咁多收入？
講返轉頭，澳門街有樣野叫做「直播百家樂」，在回力、假日等細場便有供應，而且minimum低到廿皮有交易，再加埋何少爺檔「摩卡」，大部分都係場面冷清，可見根本連「微額」賭博市場，亦已經一早供過於求，怪不得如今一個幾毛生意，都竟然會有人打主意。