內幕交易

先講兩句港股，周一中午睇白破頂在望，點知又係遇阻力回落，周二內地復市升勢勇猛，港股卻背馳跌足整天，始終逃唔出上落市命運，呢勻認真考驗大家耐性。嘉豪則立定宗旨，睇住兩個位做人，一係破頂追貨，一係五十天線吸第一注，即管睇下怎樣發展？
言歸正傳，梅鐸旗下新聞集團提出收購道瓊斯，單「刁」是否成功尚待發展，卻已經衍生出唔少新聞，其中最受注目係美證監已經就「春江鴨」活動積極進行調查，且據報遠至香港一對夫婦，事前曾越洋大量吸納道瓊斯股票，賺取了高達US$8.1M利潤，正面臨內幕交易控訢。
另一宗則涉及華爾街日報編輯，懷疑其以職權抽起了所知消息押後刊載，正遭調查是否與認股權證交易有關。
嘉豪都係傳媒人，尚幸所處是馬圈，並無任何「內幕貼士」守則，畢竟跑馬唔係話贏就贏，論把握根本遠遜買賣股票。我特別想講一下前線記者，他們每天都與圈內人談馬，但限於篇幅及內容吸引性，其實無可能做到有聞必錄，假如沒有報道(或編輯認為用不著)某匹馬的獨特消息，自己卻走去下注贏了錢，道德上應否算是內幕交易呢？
至於食財經飯之同業，相信平時也聽聽埋埋唔少消息，幾乎可以肯定講句，必有人曾經從中獲得好處，問題係既不容易查辦，監管機構對「春江鴨」活動，似乎又唔係睇得咁緊，所以類似華爾街日報事件，印象中從未發生。
當然，無論係馬圈貼士，抑或股場內幕，都無人可以拍心口必勝(賺)無疑，一個唔小心，同樣有機會誤跴地雷者！