溫總送禮

恆指是日急跌逾1,500點或5%，全因溫總正式表態，指出對推行「港股直通車」，尚有四點考慮須予解決。

總理開到口，唔會係巧合，梗係算過度過，背後帶有某種目的。近在眼前港元被捧到熱騰騰炒脫鉤，港股又坐住直昇機咁不斷與天比高，這番說話，是否有意用來冷卻上述熱潮？

香港自「沙士」以來，全賴「阿爺」不斷畀著數，至能夠咁快速反彈起來，八月中受次按風暴牽連，亦靠急就章來招「港股直通車」升突。講白一句，就係要向全世界 (尤其台胞) 展示，我地一國兩制之下生活，比諸昔日殖民地時代猶有過之。這回溫總出言，你估佢預計唔到會引起市場震撼？此所以，目的明顯是求「降溫」，而唔係要做到「熄火」，否則令我等蟻民慘痛失財，不就被看作千古罪人？

投資世界中，愈係未落實的好消息，往往愈能教市場憧憬。「港股直通車」是把尚方寶劍，一天未拔出來，淡友都唔敢輕舉妄動，頂多係製造下調整，舞得太低時更有QDII出手托住，換言之，拖拖下反而可免急速爆煲，所以我覺得溫總此舉，係送禮多於靠害也！

嘉豪早講過見20天線會出手買第一注，這天立即趁尾市調動ＭＰＦ，持貨又回復到50%水平；至於餘下子彈，我決定用平均入市法處理，初訂每個月6號同21號各買5%，以五個月時間變成100%持貨。大家若像小弟般中長線睇好，不妨參詳一下。