四叔

上周五半日市，美股回升逾1%，為結算前港股帶來較穩定外圍環境，這邊廂又有「四叔」放風謂預了百億吸貨，多少構成一些抒緩心理力量。

啟蒙師兄心水清，叫小弟諗返轉頭，「四叔」冇幾多日前至出聲話個市會大幅波動，何以僅相隔數天，便急急推翻昨日的我？按理去到佢之級數，講句說話必諗過度過，這次會唔會係有某些巨大力量(例如北大人)覺得跌得太深太快，所以借佢把口托一托市，就如當日急就章掟出個「直通車」方案？

歸根究底，個市係咪就此喘定，然後拾級回升，始終仍要睇全方位大形勢，尤其環球資金情況。其中一個重要參考訊號，始終係澳元兌日圓交差盤，蓋由本月5日處106之上，僅三周便跌至去周五曾試穿94，按目前日線圖MACD仍處「雙熊」，RSI(14)報30而觀，無疑已經處於超賣階段，但仍待發出轉勢訊號，才可望正式完成利差交易拆倉，再至逐步建立新倉，把資金搬回市場玩過。