鑊鏟翻身

前文已經提過，鑊鏟股開始回復異動，果然日來已經逐漸由這類動輒標高幾成股仔佔據升幅榜，相信不久之後，街頭巷尾又將出現大量順嫂股神2.0版。

睇返大市，恆指30,000大關總是驚鴻一撇，每觸及便引來沽家出貨，而且次次回調幅度相當，先後見回落到28884(16日) 、29265(18日)、29333(24日) 及29314(25日) 才見支持，但又每番能夠迅速衝回高位，假如係咁兩邊炒牛熊證玩波幅，餐餐執幾百點都咪話唔和味。

是日恆指走勢則有點特別，之前係日高日低，今次卻係成個「W」姿態，單日內完成整個反彈過程，創造出恆指最高收市位，似乎已經為衝向另一新高儲足動力，欲把握FED議息前最後時機，兼恆指結算之際，傾力盡挾淡友。不難預期，假使能夠正式衝破30,000大關，引發沽家投降推出大量平倉，彈指之間便可以多爆升一段，待那時方正式收割，回報便更加和味。

當然這只屬小弟主觀預測，且看估得中否？

補記：上文寫在美股開市之前，卻原來歐股至中段已經熱火朝天，連一貫性格「內斂」之德國DAX也標高達1.5%，無怪乎恆指三點鐘後一抽而上。處此外圍強勁形勢之下，月底不超高結算幾稀矣！