漏水茶壺

有個日常生活經常碰上之小問題，就係唔知點解，但凡去到酒樓茶室，時不時會遇到漏水茶壺，有時係個蓋邊漏，有時係壺咀漏，總之斟完茶梗係天一半地一半，台布弄濕一大笪。
但係又唔見人地 Royal Doulton出品一個漏水英式茶壺，或者日本仔茶壺會漏到周圍係，何解偏偏我地中國茶壺咁鬼差？
有人答我話：酒樓用Ｄ平價貨，點可以同 Royal Doulton比呀？
上述講法只係表面證供成立，事關茶壺漏唔漏水，純粹係設計問題，就算只係賣十蚊個茶壺，都係要做個模出來者，有心改善的話，使一兩千銀買個來路貨回來，照抄起辦做佢一百幾十萬件，按理唔會增加乜野成本，真正問題關鍵，係生產之廠家有無心將樣野做好矣。
其實各行各業都有類似現像，同樣一對硬底皮鞋，Gucci可以跴足一日都無事，但係 Le Sauda就三粒鐘已經想叫救命，呢個唔止係三千銀同三百蚊之分野，而係反映賺你錢之商人，究竟有無真心想令到顧客滿意。
人生其實都係咁，只要能夠不斷自我鞭策，兼懂得取人之長補己之短，自然唔會有變成漏水茶壺的一天。