MICE & 筆克遠東

Meeting (聚會), Incentive (鼓勵), Convention (會議) 及Exhibition (展覽)，組成了現今企業最盛行的 MICE 旅程。白 D 講句，即係由阿公出錢，畀班中上級伙記出外充電兼「腦震蕩」，希望帶來新鮮感及新靈感。
前幾篇嘉豪寫澳門酒店入住率問題，就曾經提及過我位世伯之言，佢謂只要阿爺金手指一點，將澳門列為 MICE 聖地，咁就算金光大道各巨型娛樂酒店全部落成，都唔慌會出現「吉」房處處現像，情況就好比海南島三亞市，轉幾個身已經由昔日農村，變成今日首屈一指國內渡假城市。
筆克遠東 (752) 早幾日公布零六年業績，以前從未留意過此股，但睇下睇下，無怪早年惠理已經霸住個股東位置，不過後來減持至 5% 以下，如今是否依然持股，你唔知我都唔知。
從公司網頁中可見，筆克最新每股稅後盈利 11.61 仙，為四年前之四倍，實際上則是近兩年利潤才較為見「肉」。財務報表我唔多識睇，但主要項目變化不大，呢關應該無乜問題。
我覺得筆克遠東應該尚有相當潛力，事關已經在展覽行業打響名堂，此時國內企業逐漸走出國際，海外資金則隨開放金融市場等 WTO 效應加速進入，個餅不斷在擴大之中，這類大型展覽及會議專業攪手，必然可從中受惠，加上國內企業 MICE 成風，保持三五年持續增長應非問題。
不過對付呢類半冷門股要講耐性，最理想係等成交靜番，散戶欠耐性逐漸退出之時，才排盤於低位吸納；按圖索驥，$1.4 左右雙底係無敵價，只要等到 $1.6 樓下入貨，值博率應該十分高，嘉豪已經 set 定部股票機到此位即提醒我，實行守株待兔對付之。