《忍者龜》令彩星翻生？

睇聯交所公布，彩星 (635) 近期頻獲吸納，從股權披露中可見，大股東陳俊豪去年十二月中開始逐少增持，日前更獲洪錦標名下基金掃入 7.14% 股權。
洪錦標何許人？意馬 (585) 第二大股東也！後者重頭戲《忍者龜》三月上畫，剛剛於日前由里昂完成配股，肯在高位接貨，買家當然唔單止睇概念，多是有信心《忍者龜》將在美國大收旺場，趁住好消息出現前火速入閘。
《忍者龜》係咪會賣個滿堂紅？問負責生產有關玩具之夥伴彩星，應該會摸到個大概，事關套戲三月上畫，海外玩具商必須好早落定訂單，配合上畫前開始推售。換言之現階段有關《忍者龜》玩具，大概已經於付運途中，賣唔賣得，彩星當然心中有數；讓嘉豪估的話，美國消費市場依然興盍盍，去年迪士尼動畫亦大旺特旺，呢個形勢下確可打定「贏」數。此階段大股東增持，夥伴又掃貨，你話係咪更加屬先兆？
最後補充番句，彩星近年被投資者摒棄，除因「不務正業」涉足地產買賣，不久前還更換了核數師，是否可借此契機翻生？大家各自諗清楚至好。