好股唔怕談戀愛

記得嘉豪開 Blog處女作，係評論高陽科技 (818) ，當時股價在 $1.4左右，三個月後今天，已經足足升值一倍，證明唔係亂咁吹。(欲重溫，只要找右下角 Archives，按2006-10-01即可)
問題係嘉豪曉寫唔曉動，從來未買過佢一股，事關總係等等等，寄望遇到調整時方出手吸納，豈知此股升到無回頭，縱使經常成交疏落，卻未嘗出現過一次較像樣調整。
猶記得最初留意股票，是一年前人地畀「貼士」捧意馬國際 (585) ，假使當日盲椿椿買入，持有至今已經是十多個「開」收穫。當然實際上很難有此能耐賺到尾，我掏腰包它已經是 $8股票，即比最初升了五倍時，而最後賺了兩成多便賣出大部分，正式係捉到鹿卻無脫角。
有謂切莫與股票談戀愛，但畢菲特有今時今日，正由於佢肯與「好」股作愛情長跑，足見上述說法未能作準，問題係究竟邊隻才算「好」股而已。
嘉豪近兩個月從未涉開倉買賣，手中一直緊持兩隻變身股，一為勞氏環保 (309) ，二為中國礦務資源 (340，現仍稱創富生物科技) ，其實也早在開 Blog 初期輕輕提及過。若有留意近周市場走勢，相信無不注意到兩股股價皆快速上升中，小弟笑逐顏開自屬必然。不過此刻問題卻來了，究竟應分段減持套利，抑或繼續耐性持有，let the profit run，以免再嚐 (585) 丟掉口中肥肉之苦？
佢地係咪算「好」股？呢個係我日來不斷思量之重要問題，可惜始終未找到答案。