何Fun之有？

馬會由第41次賽馬日推出 Fun組新彩池，即係源自日本仔之括弧號碼，最初投注者貪得意試下，都叫做每場有成百萬彩彩池，但係短短唔夠一個月，到年初八第46次賽馬日，全日11場加埋得 $3,159,530投注，平均一場唔夠三十萬，玩足成日及唔上一隻熱門馬披士負票，與被判死刑無異矣！
其實由此彩池首日誕生，行內人已經睇死佢必榭無疑，只係估唔到快得咁緊要而已。表面上Fun組「死因」係賠率低，但嘉豪覺得唔單止係呢個問題，最大鑊仲係中彩者必然以其派彩與獨贏派彩直接比較，兩者差天共地之下，隨時更畀身邊朋友笑到面黃，馬場係英雄地，豈有人能承受中了彩卻遭訕笑之挫敗感？
嘉豪好早建議過一個低賠率彩池，方法係純賭頭馬「是否大次熱門其中一匹」，換言之僅得 On 同 Against兩瓣選擇，信賴熱門者可買 Yes，賭熱門死火便買 No，根據全季數據，兩者平均機會係一半一半，雖然如此賭法賠率唔會高，隨時買十蚊贏八皮半，但係唔使多傷腦筋，兼提供賭熱門死火之英雄感，我相信比諸Fun組會受歡迎得多。
假如係像馬會最初所言，Fun組係為照顧純新手馬迷，咁倒不如用三甲馬號碼賭「三公」，因為可以開出 0至9共十瓣選擇，而且「幾乎」係純碰運氣 ( 除非有場馬一面倒由三駒控制大局 ) ，賠率又不會乏味，甚至連資深馬迷在輸到六神無主時，也隨時會加入一博，不也遠勝無Fun可言之Fun組嗎？
至於欲明顯谷起賽馬投注額，看來除推出 Fixed Odds外應別無他途，早前曾傳出馬會入股英國 Tote，是否已經考慮作長線部署，借別人出手而從中分成，免除馬會變成既負責監管又做庄對賭之尷尬身分？