搞乜輪？

嘉豪係投資初哥，對Ｄ衍生工具，除左最初細細地玩下牛熊證當交學費外，一直敬而遠之，但係早排見美基金猛吸領匯 (823)，加上收到少少風，忍唔住手入左多少七月到期之價內輪 4515，期間睇住正股由 $17.5 升至去周五貼近 $20，隻輪卻像烏龜爬行甚至負溢價，終於明白發行商真係立於不敗之地。
呢隻4515由摩通發行，行使價 $15.88，兌換率十換一，嘉豪唔知應該計幾多財務費用咯，但係尚有四個多月方到期，點都應該唔少過 2% 卦。唔好理佢乜野引伸波幅咯，當領匯僅 $19.8 計，輪價都應該值 $0.43，但係去周五摩通買/賣盤長期相距六格掛出，即係出入相差成 7%，最高更只係掛到 $0.385 買入，你想平倉食糊？打個九折收錢喇！
好彩此輪僅佔嘉豪總持貨額 3%，加上早於 $0.25 買入 ( 當時正股約做 $17.8，付出逾 3% 溢價 )，尚有能耐同摩通鬥長命，若某日此股當炒，佢自然要乖乖奉上合理價格，兼送埋引伸波幅畀我笑甩棚牙落車。
人在做，天在看，祝佢早日奸有奸輸！