世界多順嫂

趁春節假期，快快手完成了《賣竹竽小販》，開始睇到《蘋果橘子經濟學》( Freakonomics 台譯本 ) ，都係令嘉豪津津有味作品。常言道書到用時方恨少，小弟愈來愈發覺自己對經濟財務方面領域最感興趣，睇落都應該部署一下，搵個時機走到校園進修去。
當然，呢個世界又唔一定需要真材實學者。呢兩日《信報》有位作者替幾位命理名人出昔日測股成績表，睇錯者明顯佔大多數，其實有此結果相當合理，假使世上確有能準確預知未來的高人，早便應該隱姓埋名為自己進行投資，甚或圈起一批富豪組基金做大買賣矣！
記得多年前在《有線》工作時，看著一位現財經界名咀，由所服務證券行掏腰包買起節目時段兼製作費，擔任財經節目主持。當時嘉豪心諗，無「騷」錢落袋仲要貼埋畀電視台，真係搵得返乎？如今證明當日人地計算精確，出鏡嗡嗡下果然有所收成，花數十萬買個名氣回來，比我地抽中 IPO 收穫豐富得多也！
正如阿叻於《志雲飯局》所言，有「名」還怕「利」不來乎？畢竟這是個 20/80 世界，順嫂之流僅懂得拜表面名氣者，始終係佔大多數。