老歌解碼

好耐未踏足過紅館 (唔係表演，係睇騷！)，大年初一晚老友關照，去左聽溫拿演唱會，節目 rundown 編排得幾緊湊，全場無乜悶位，算係唔錯之娛樂矣！
近年較少接觸流行音樂，有都多數係駕車途中，又極少唱Ｋ，已經有Ｄ脫節。不過嘉豪少年時代已經跟老豆，落中環娛樂行金寶捧初出道之溫拿，黑膠碟年代聽唔少ONJ, Elisa Chan等，後來到 Danny 仔、阿倫、Leslie 年代，佢地Ｄ情歌直頭調轉唱都識背也！
此所以聽溫拿一批老歌，感覺就有如 rewind 緊餅人生錄映帶：唱人地名作Wind Flowers, Goodbye Yellow Brick Road 時，就係我讀緊小六，跟家姐「開Ｐ」階段；到左阿倫全盛期霧之戀，則係嘉豪中學畢業，拿住張肥佬沙紙徬惶無助時候；最要命係連邊首歌代表邊段感情，都立即 recall 返晒出來。簡直可以話係「一首歌一個故事」，年份次序排列得清楚有緻，老人癡呆都未必記得咁詳細。
若果大家同嘉豪一樣，從來無寫日記習慣，又想回味下已經逐漸遺忘之少年時代荒唐事，最佳辦法當莫如捧下「老溫」場！咪住，呢樣音樂解碼方式，諗諗下會唔會有乜野商機呢？