山頂地王

新地（016）以呎價 $42,658 買山頂加列山道地王，看翌日報道，將建成十餘幢獨立屋，並預期為發展商帶來五億元利潤。
純粹從用家角度而言，山頂絕非「最舒適居所位置」的首選，上山路徑狹窄多彎，春霧籠罩時伸手不見五指，還不時會因假日遊人構成交通擠塞，但香港僅得一座太平山，太平山僅得一個山頂區，那種「大地在我腳下」的傲氣，當非其他「山」的「頂」所能比擬。加上山頂地皮係得咁多，無得填海擴充，又 99% 唔會在附近建公屋、居屋（唔好完全否定，畢竟連椿砍角、赤柱都有！），炒供求之下，出現任何價格都唔可以話誇張、過分！
過分者反而係其他豪宅、或曾教授話齋「Ａ貨」豪宅業主，紛紛趁賣地消息加價或封盤。大佬呀，人地山頂地皮賣天價，難聽Ｄ比喻就好似乜姐選美冠軍賺外快，收一百幾十萬「打賞」都唔算多，最緊要有人肯「拔槍」，事關冠軍只係得一個，但咁唔代表所有入圍「佳麗」就可以跟手吊高來賣，水鬼齊齊升城隍罷！
講到「Ａ貨」豪宅，近期火炭新盤，以至對面「河」馬鞍山側，無不加上「九肚山伴」或「望」九肚山為賣點，假如係咁計，則九龍好多地段都可以用「望」太平山山頂為招徠，地產商們實在當買家係白癡。
講返加列山道地王，話就話天價，不過真金白銀計只係 18 億成交，以嘉豪小人之心度之，就算他日此盤打和甚至蝕多少售出，對新地（016）來講都必有好處，事關近期樓市本值呆滯，花些少錢做個「看好後市」姿態，可同時當作 Marketing 部署，以帶起市場氣氛鼓動買家入市，借其他如「倚巒」等新盤賺個夠，拉上補下依然除笨有精。正如某Ｄ炒高了十倍八倍的神仙股，莊家早在低位大手吸夠貨，就一定唔會怕高位加碼，事關整盤數計愈貴愈賺得「甘」，有驚者都係後期加入怕跳唔切車之跟風客而已。