美麗謊言

美麗的謊言大部分時間不會構成傷害，惟獨投資領域中，這卻是一服糖衣毒藥，誤吞下去隨時死得人。

不用說年內最經典的當是「最壞時刻已經過去」這一句，每天翻開財經報章，或者電視電台節目中，好些所謂專家的投資推介，便已經是一個又一個的美麗謊言。

慶幸自己是個講馬佬，一場就算十四匹馬跑，也總會產生一隻頭馬出來，所以貼馬始終比較容易。當股評家就唔同，遇著近半年市況，三十幾隻藍籌任你推介，全部都係得個桔，惟有一次又一次見紅，EQ低多少都好難面對群眾。問題癥結在於假如沒有人買股票，媒介捧場客減少，股評家的收入及名聲也免不了會下降，所以不論牛市熊市，他們都要叫人買股票，分別是牛市通常十中八九，熊市則十中一二。尚好他們最後總會補充一句：記緊要訂下止蝕位，輸大左唔關我事。咪當十個八個巴仙買個希望，大家蝕得起者！

或者大家唔相信名氣真係有影響力，我卻深刻記得一位現已屬名家級之股評人，多年前不見經傳，後來自掏腰包買個電視節目時段講股票，投資二三十萬自吹自擂一番，果然便愈來愈見吃得開，三爬兩撥登上一線位置，論其投資眼光與回報，畢菲特也隨時要被比下去也！

最後補番兩句恆指市況，連跌兩日果然插穿22,000，小弟先食了一半糊，餘下則繼續let the profit run。當然唔排除仍會出現反彈，不過按連日觀察，期指22,550為一相當關鍵位置，應該唔容易三兩日間返回其上，所以見22,500的話，不妨又加多一注熊熊。