茶煙飯

早排細價股熱炒，number滿天飛，只要「炒鬼」金手指一篤，動輒舞高弄低二三十格，夠膽汁兼身手敏捷者，每日茶煙飯市場找數，真箇不亦樂乎。

嘉豪自問係穩陣派，縱使收到風有人「做野」，通常都將買盤掛到貼住地平線咁低，根本無幾可成功開倉入市，所以一眾神仙股對我貢獻相當有限。不過，小弟又並非完全無出招，事關唔打速動拳，都可以耍太極以柔制剛，雖然動作慢得多，卻同樣能夠達致獲利效果。

我的「茶煙飯」係工業股日東科技(365)，由二月份開始，此股長期於四毫邊至近五毫子之間上上落落，每日成交平均僅三幾「球」，就係咁低買高賣炒range，唔經唔覺玩了四、五轉，穩陣得來趟趟有逾一成回報，計落其實幾和味。

報完喜就報下憂，手中兩大「重手」孖寶勞氏環保(309)同中國礦業(340)，近月來皆逞「反高潮」，前者大折讓四蚊雞配股，後者則$1.88，兩隻野皆復牌後跌向配股價，睇落均要待市場消化一番，才知後向如何。

補記：是日《經濟日報》有單中國礦業正洽購另一金紅石礦消息報道，料不到晚上即收到港交所通告，披露有關洽談事宜，反應快得交關，更加設立兩條電話熱線供查詢，認真到你唔信。記得前此報章刊登高層不和消息，中礦甚快便作出澄清，後又多次發出自願披露有關收購哈爾濱鉬礦進度消息，管理層保持企業透明度之態度，實在值得一讚！