我喜歡周日跑馬

依度係嘉豪私人空間，唔需要理會公眾想法，所以以下意見純粹個人，大家唔同意都係咁話。
馬會愈來愈多編排周日跑馬，我明白好多人視之為家庭日，但作為講馬老，日賽出足有成 140 匹馬，如果得一日時間去刨(因傳媒早一天截稿及做貼士節目)，實在無可能應付得來。
你會話，o車，藉口o者，畀多日你貼士都唔準o架啦。無錯，因為貼士準唔準係講彩數，但係我覺得講馬老最大責任並非貼士準，而係要為馬迷找出值得參考的意見，譬如那匹馬狀態有上落，或者之前賽事中未能或過份反映實力，然後留待馬迷自行判斷取捨。此所以，嘉豪從來唔會為貼士得失而耿耿於懷，贏固喜敗亦欣然，蓋自知已經交足了功夫，問題係當周六跑馬時，通常都難有時間再三檢視錯漏，就會覺得並未盡克己責。