Craps

賭場玩意中，嘉豪最「迷」係擲骰仔，即係花旗骰(Craps)。唔知花旗骰係乜東東的話，可以走去新葡京綠金層參觀，又或者搵番套陳年舊片半斤八兩睇下，許冠文點樣用兩粒紅骰仔猛掟「七」贏大錢。

呢個可以話係賭場中最刺激玩意，嘉豪試過一次用五舊水本錢，唔使兩個鐘頭內贏超過二萬蚊，不過真正係十年唔逢一潤，埋得台玩預左九成九輸錢，事關呢種玩意最充分燃點起賭仔貪念，當你鋪滿成台籌碼收租咁收之際，就會掟個「七」出來本利輸清。

百家樂也如是，縱使搵到長莊長閒長藍長紅，賭仔最初都係賊佬試沙煲，中得幾口才愈買愈心雄，到「豬仔落晒船」圍到成台幾「浸」人，一鋪爆路賭場就殺番一大橛。此所以開賭者永遠立於不敗之地，蓋人之貪婪乃屬本性也！