放假囉

廿幾年前初入行，六月初便抖暑，到九月尾才開鑼，暑假流流長三個幾月，雖然仲係要返工做暑期馬經（最初無此物，卻由小弟服務之《新報》帶起），但係由於無賽事壓力，其實相當疏乎。

自從放下編務變身全職講馬佬後，馬仔抖暑人亦放假，雖云今時暑期縮短至兩個月，不過已經羨煞幾許旁人，蓋就算要開鑼前睇下晨操，腦袋於此階段仍然可以完全放鬆，毌須為工作事掛心。

昔日暑期總是無所事事，去下旅行、吃喝玩樂，一派輕鬆享受人生。不過自從投身股友行列後，積積埋埋大疊財經報章，還有不時掃入名家著作，早已經把客廳及書櫃的空位，佔據得八八九九，肯定需要花費大量功夫，方能夠成功消化矣！

美國慶假期休市在即，這天港股於成交不算大之下再創新高，唔排除係有心人趁「市薄」測試淡友力量，嘉豪總係覺得挾來挾去都靠中移動(941)，最怕呢種環境撲入去被綁，所以寧願眼望望齋吞口水，但求ＭＰＦ盡量多賺算了。