誰在賣？

先旨聲明，嘉豪本篇內容純粹猜測，完全無聽聞任何內幕消息，觀後更勿因此入市買貨。

寫得咁謹慎，係因為見中國礦業(340)股價不斷下瀉，卻未聞傳出任何不利消息，故試圖找些蛛絲馬跡。

上月中礦以$1.88配出新股，由於比市價折讓逾一成，個別大戶乘勢「換貨」，眨下眼有利潤落袋，可以話毫不出奇。不過到了近七個交易日，股價已經開始潛水，去周五起甚至變成大低水，接了新股者沽貨難有利潤，誰會存心去做蝕本買賣？

未知大家可有留意，七月五日中礦曾發出董事變更通告，其董事總經理兼副主席陸健辭任，且於通告翌日立即生效。你同我唔少係打工仔一名，執頭執尾都要一個月通知喇，更何況係上市公司副主席？據內容透露，陸先生準備從事彼感興趣之業務，按理公司由部署轉型至今已經逾年，何解依家至發現唔感興趣？

按聯交所紀錄，陸健先生離職前，屬中礦第二大股東，持235,234,000股，佔擴大發行股份後4.02%，折現則為三億多元，基於陸先生已經離職，持股量又不足5%，究竟其目前尚持股多少，已經無從得知。

如今最大問題，係中礦尚有單收購Fullight金紅石礦權益進行中，更事先張揚將以$1.88作價換股，假如屆時股價未見反彈，就唔單止無折讓，甚至乎係大幅溢價，對方咁蝕底都會肯制？當然，換股價可以重新修訂，但係發新股梗係愈少愈好，否則攤薄晒之下，又好難向已經高價入股者交代嘛！