意馬(585)風暴

嘉豪一再談意馬(585)，因為我對投資股票之興趣，係源於睇住此股去年狂升所引發，雖然並未受其惠而大賺一筆，但啟蒙了我認真學習資產增值的態度，其實收穫比金錢更加寶貴。
《忍者龜》(TMNT) 在美出閘俐落，卻原來僅屬虛火，截至剛周日復話節假期後，票房收入僅US$47M。還記得《經濟》報道意馬高層談過拆帳方法，此片收益大概達US$120M以上才可獲分紅，如今達標希望渺茫，且尚未知需否分擔有關宣傳費用US$35M，把袋穩了的US$30M製作成本拿出來贖身。
之前入股基金見勢色唔對，去周已經開始逐步出貨，假後復市更清倉式賣股，沽家行列中高盛、美林頻頻露牌，反而不大發現花旗影蹤，不過唔排除其實係借緊「橫手牌」，結果到半場休息已排下跌榜首位，市值比對高位蒸發近半，復補一張聯交所公告，也例行公事而已。
短線唔掂，長線又如何？講句真，意馬硬件其實幾有水準，新近更在美招兵買馬，加強團隊製作能力，呢方面唔會因TMNT票房低收而受影響。問題在於攪電影始終創意為先，隻「龜」唔叫座，遲下小飛俠、神勇飛鷹俠同樣係舊電池，更難求於國際市場突圍，欠缺好軟件至係真正令人頭痛。
對小股民而言，三、四線股仔何其多，如今神仙落難，唔炒東家炒西家，相信有排都眼尾唔吼矣。