盡力壓低

打針無咁快，轉個頭恆指已經返落二萬三樓下炒，嘉豪所持熊證盈利逾六成，雖然話「止蝕唔止賺」，不過近期市況快上快落，最後決定採取保險方案，先平一半倉袋起大半成本，有剩就睇是日三點後尾市走勢定奪。反正周四方是期指結算日，淡友趁形勢稍佳，應該會盡力壓低至聽日半晝，好友亦樂得從較低點開新倉砌過。

睇恆指圖，恆指此番「跌盡」唔應該低過21,650(上周二宣布北水自由行翌日低位)，假使有心「上車」，等到二萬二應該起步分注吸納。至於由22,000至23,600之間的起伏波動，可以小注用牛熊證捕捉，熊證(買跌)首選#6362，24,000點回收，次選#6377，24,500回收(安全度較高)，牛證(買升)則僅20,500點回收之#6411合適，全部皆瑞銀發行。當嘉豪偏見，買輪我只信賴UBS招牌。

不過無論點玩法，短炒波幅應該九月中前收手，蓋到美、日議式重要關頭，市場反應如何難以估計，與其留在股票市場博，倒不如走過威尼斯人矣！