鑊鏟股

唔使嘉豪解釋，大家都知道鑊鏟股係邊類。

只要股市夠暢旺，游資四周圍滿瀉，鑊鏟股自然可以蓬勃生長。佢地之進化過程，大概都走不出一個方程式，首先搵隻冷門平殼，度番個轉型概念，跟手開始低位收貨，到咁上下便配新股為項目集資，搵到基金落疊固然理想，否則求其湊幾件獨立投資者，照樣水到渠成。

概念係咪成功將來事，搞單生意花完一兩年起步，再等到真正營運兼入帳見街坊，隨時三數年光景，唔當長線都起碼屬中線投資喇，試問在最講究「機會成本」之大旺市中，點至可以引起資金垂青？最好當然未過終點先派彩，炒高回完籠再袋多兩三個開，剩低唔使落「真本」咪慢慢坐咯，至於接棒者音樂椅玩到幾時停下，就關人個關矣。

上述方程式唔係乜野新事物，嘉豪特登寫出來，只係想提醒自己同大家，沾手呢類鑊鏟股，搭完順風車就要速速散水，就算遇後來股價大幅插低，都唔值得貪心博走多轉，畢竟人地一兩毫子成本價，隨時可以舞到三幾蚊出貨，炒完炒剩跌番落一個幾毫，有傷亦只傷你街外人而已。

正所謂「賣仔勿摸頭」，玩鑊鏟股尤其要緊記！