多研究 少出入

嘻嘻嘻，又開口中，恆指三幾日間迫近19,000，做淡者被挾到失暈。

先睇番盤牛熊數，牛359球對熊4,079球，散戶又見排出人肉城嗇，過夜街貨側埋一邊。唔知大家有無發覺，去周恆指通常都係早段裂口高開，先橫行以至稍作回軟，然後到下午或尾段方再上升。大戶如斯舞法，最容易引誘散戶開熊證，蓋彼等以炒即日鮮為主(牛熊證成交七成在上半日)，首一個半個鐘見個市升唔上，自然會心思思買入熊證，可惜通常至上午收市也僅一百幾十點利潤，侷坐到下晝即打回原形，最後被迫過夜博一博，就此便多累積新一批蟹貨。

期指方面，周四大升變小升見陰燭黑墓碑，淨倉卻是減數，反映了淡友未敢出手，到周五好友便立即發力，恆國兩指合共增添了近4,000張淨倉新單，此所以當日雖外圍升幅有限，恆指卻進帳了逾2%，成為區內最強市場。至於期權倉位，即月15,000及16,000 PUT在周一(13日)大跌市後未見加倉，其實已經是市跌不下徵兆，到周五升至相對高位後，也僅見17,600與18,000 PUT各比周初添了約300張。縱使現距結算還有兩周時間，淡友大致上已經潰不成軍。

餘下問題，乃是否能夠一舉穿越早前19,161高位？觀八月期權，暫時僅在20,000 CALL與16,000 PUT見千餘張較重貨，而即月CALL也是20,000重貨，且後者加倉數相當有限，看來縱使本月可以創出年內高位，也未見得有把握抽升至20,000樓上。除非是本周初見期權數再有異動！

錯過了周初入市的話，現階段便只有按兵不動。參與了市場一段日子後，嘉豪也愈來愈明白「多研究、少出入」的道理。