紅人反口 倉主捉弄

講單馬圈紅人揀座騎，遭倉主捉弄古仔娛賓。
話說呢個周三有隻低班貨色，上次由紅人助陣一擊即中，早早講好繼續攜手望食多劑，佢亦都好似一條心咁晨操摸住，點知正式報名前紅人故態復萌，臨時臨急又欲推庄。
紅人自知理虧，電話打畀倉主副手，隱隱晦晦謂早有另一倉主邀騎，但係就唔打算出「王牌」報名，換言之未必有機會列正選，所以只係買個保險講低一聲，唔一定會效力別駒者。
倉主收到副手匯報，挑通眼眉知道紅人又準備出爾反爾，不過客大欺店，早被放慣了飛機，而且搵過第個幫手都非難事也！只是始終有多少心心不忿，諗到計仔捉弄一下紅人。
倉主立即致電紅人，謂既然別駒不打「王牌」，那麼成正選機會應該甚渺茫，所以唔打算搵人接手，假使人地真係咁好運，咪放紅人做個人情咯；不過佢額外補充一句，謂假使人地隻馬出「王牌」，咁就唔同計法咯，事關已經準備好通知馬主，紅人會繼續執韁。
紅人聽罷上述一番話，詐詐諦諦謂要查清楚別人意向，隔無耐終於致電倉主 say sorry ，話自己誤會在先，人地原來係打「王牌」報名，所以多數幫唔到手云云，倉主聽完笑到碌地，不過當然最後照放人也！

南非開禁

嘉豪較少在 Blog 中寫馬，有云做個行厭個行，雖然並未至於對賽馬厭倦，但馬季初開無乜野特別，流水帳則寫來無意思。
上日收到南非賽馬發展局 Gibson 兄電郵，報上歐盟正式對南非馬匹出口解禁喜訊，將來秋涼日子，可從開普敦直接輸出馬匹，免卻了這兩年多來需繞道毛里裘斯兼多重檢疫之苦。
南非馬被禁直接出口，主因是當地蚊蟲為患，且連馬匹也蒙害，會染上被稱為 (AHS) 之病毒。若無記錯，當年童國鈞先生名下灰馬「顯顏色」，便因禁出口令而一再轉接，結果折騰了一年多才能成功運港。(按：記錄上「顯顏色」來源地為阿根延，嘉豪未知何解！)
今時今日世界各地好馬難求，尤其曾出賽ＰＰ，叫價高到嚇死人；暑假期間便接過一件「貨」，此為二轉三歲澳洲馬 Down The Wicket，一開口要六十「個」澳紙，即係幾乎四百粒港幣埋單。上網睇睇佢點巴閉法，卻原來已經連場兩歲大賽搏完搏剩，仲係得個近字無威脅個隻，咁都夠膽開天殺價，真係搵鬼幫襯。
南非賽馬水準當然無得同香港比，但係價錢尚算比較「相宜」，特別係對一部份想用 replacement 方式搵隻平價高分馬的買家，應是理想退而求次對象，睇落兩位南非練馬師，對有關消息必然相當高興。而且據老友告知，有匹當地馬王級良駒，正由霍利時與一位本港馬主合養，睇落勢將安排東來歸隊。

留言乾塘

這個 Blog 開張不足一個月，Hit Rate 愈來愈理想，不枉嘉豪心血，在此先行感謝各位所花寶貴時間。
其實未知何故，剛周日 (10月29日) Hit Rate 突然大幅標升，事關按以往記錄，通常到訪者以周一至周五較多，這點倒令我有點莫名其妙。
稍覺得可惜的是，大家始終多看少寫，留言與嘉豪交流者不多，甚至於我偶像 Peter 兄的 Blog，每日 Hit Rate 多達逾千，留言同樣寥寥可數，或者大家都是性格比較內斂，唔似我等傳媒中人「唔知醜」罷！

山雨欲來風滿樓

這天港股休市，日股急挫 317 點或 1.9%，歐洲股市亦向下調整，看來美股情況將好極有限，周二港股裂口低開成定局。
恆指去周五締新高 18465.54，下半日卻轉向跌至 18232.64 才出現支持，反彈上18297.55 收市，仍倒跌 56.19 點。值得注意是恆指跨月未平倉合約升至接近十六萬張，指數跌而數量升，主短期後市向下。
去周中美國九月房屋銷售數據利淡，但市場卻猶如完全未受打擊，反而闖上新高，不知是好友最後一擊，抑或淡友以退為進，無論如何，周五下午市明顯屬春江鴨活動，早預知晚上公布工業生產數據必差，所以紛紛 take profit 甚至反手沽突。
小投資者手中應有充裕現金，見調整欲上車吸納人之常情，但所謂財不入急門，就算睇好股市長線仍處升軌，還是宜候 50天線左右方動手較穩陣，去周五處 17,540，而正以每天約 15 點上移中。

The Day after Ten Days

10月18日曾嘗試捕捉國指調整，買入了熊證 #6228，結果持貨僅兩天，便因國指上揚被迫止蝕。十天之後，國指終於出現調整，還下跌了接近 2%，我曾以 $0.119 買入的熊證，是日由低位反彈上 $0.125 收市。
沒後悔作出了止蝕，反而是想到當日認定國指升得過高意念雖對，卻用錯了投資策略。猶記得我所持看法是，「恆指 / 國指」比率超出 250天平均比率逾 4%，加上國指本身比 250天平均線高出逾 17%，故預測即將出現調整。
事後檢討，買國指熊證是純粹博指數下跌，無疑也切合我的預期，但假如要把贏錢機會提到最高，更合適的做法，是同時買入「恆指牛、國指熊」作套戥，或直接「買恆指、沽國指」，當然回報率會因此大幅減少，然相對損手機會也必大為降低。
假設當日同時以收市價買入10手 #6238 (恆指牛, $0.295) 及 25手 #6228 (國指熊, $0.118)，兩者當時槓杆比率同為約12倍，所需成本為 $29,500 x 2 = $59,000，至昨天「恆指 / 國指」比率由相差 4.3% 收窄回收市2.04% 時，兩隻牛熊證分別報 $0.35 及 $0.125，持貨總值便變成 $66,250；當減去手續費 $400 計，獲利可達 11.6 %，以八個交易日時間得此收穫，顯然相當理想。
上述套戥方式當然並無新意，但只要花多點工夫做好搜集，找出「恆指 / 國指」比率變化的兩極範圍，我相信一年中必能捕捉到若干穩健賺錢良機。

長莊買股論

賭場玩意，最喜歡玩Craps，曾經試過 Across the Board 夾疊收租，手中兩枚骰子擲了接近一個小時 (當然包括每鋪派錢時間)，還不出現一個「7」，結果以三百多元本錢，贏了接近二萬元。Craps 的好處是，基本上毌須花腦筋，命運則完全繫於手中，像我那一回時來運到，便可以一本萬利。
可惜這玩意在華人社會毫不盛行，澳門自十多年前東方文華改賭廳後，連最後一台也取消了，自始走進娛樂場時，便只得流連百家樂及21點。
21點講求多少技巧，百家樂則是純撞彩，勝負繫於控制注碼，偶爾出現長莊長閒，便最考驗賭客心態。
我自己傾向用「孖寶」來夾疊，斷纜時最多是輸一注本，卻有機會每兩鋪贏三注，較保守者會用平注，也見過有些人怕自己一搭便沉船，看完一鋪又一鋪，手上籌碼卻始終原封不動。
還有一類滅絕派，長莊開出來鋪鋪「頂閒」，結果通常輸清離場！
恆指自一萬五千多抽上，終於突破了科網泡沫爆破前的高點，這階段內聽得最多的，卻是指數快見頂之危言，就此愈驚愈升，眨眼間爬行了三千點。當然仍有不少落後二、三線股，地產指數更呈不振，但絕不能否認是好友佔盡上風。
我這期間手中股票買賣頻繁，最常持有僅消息股創富生物 (0340)，另加時不時心思思買熊證博短線，埋單計數贏股輸熊執多少。還好我視此為學習階段，若真正靠之累積終生財富，則要算屬不及格之作了。
回心細想，其實此階段升市就如百家樂開長莊，與其「頂閒」博測中轉角，倒不如細細注「孖寶」夾疊，一個唔覺意升到二萬點就好和味。至於點解會升到二萬點、或者甚至二萬二點，請唔好問我，我只係相信「有智慧不如趁勢」，市場唔係一定理智操作，只要升市中大手成交額保持穩定比率，即係大戶資金未撤離，佢傻何妨陪佢傻？

好消息出貨

工行 (1398) 首日掛牌，成交額 374.52 億，佔全日總成交 49%，而交易次數高達 76,032 次，如此多項紀錄，相信可以保持一段甚長時間。
港交所 (0388) 做其獨市生意，加入如斯「重秤」股，生意繼續強勁增長可料，但市場每每就是好消息出貨，此股由月初 $56 升至接近 $65，正欲挑戰歷史高位之際，就在今天工行上市日豎出一支大陰燭，時間實在夾得剛剛好。

BEA 股票網癱瘓

這天工行 (1398) 掛牌，讓我見識到東亞網上交易股票之「能耐」，開市首個半小時內，基本上難以登入戶口，三翻四次嘗試後「擠」了進去，落買賣指令時又如窩牛般極慢速處理，等得三數分鐘落完了盤，最後卻未必獲得執行，認真一肚子氣。
只是一隻工行掛牌，已經如斯大鑊，假使有天大盤突然急瀉，看來將更難有機會及時上網拋貨了。(0023) 這支藍籌股，經親身體驗其服務一番後，實在無法令我心動，唉！

高寶綠色 (0274) 跌得離奇

自九月下旬公布中期業績後，高寶綠色 (0274) 股價立即插水，由 $0.87跌至是日收市 $0.77，跌幅 11.5%，比對五月中剛公布全年業績後高位 $1.24，更縮水達 38%。
表面上中期溢利 7,586萬，較去年同期減少 3,179萬，但去年因在星洲出售 Bio-Treat Technology 獲特殊溢利 4,466萬，故若撇除此溢利，實則是多賺了1,287萬。
不計去年之特殊收益，調整後近三年實際中期除稅前溢利為：賺11,938萬 (06年)、10,290萬 (05年) 、4,931萬 (04年)，年增長16%、109%及負47%，翻查04年中期業績倒退主因，是03年沙士爆發帶旺了家居及個人護理產品，而風潮過後營業額劇降 25% 所致。
化庄品業務近年發展理想，營業額由 03年 5,457萬，穩步上升至 06年 17,900萬，由港澳18個、國內105個專櫃，增加至港澳20個、國內150個專櫃，有關毛利率達 45%，此部份業務所產生利潤相當可觀。
基於下半年石油價格下降，對減輕工業用產品及化庄品成本必有幫助，當作每股全年盈利 $0.16，現價P/E不足5倍，本身財務狀況穩健，兩年後更有元朗工業村綠色再造能源概念，如此無厘頭一跌，是否值得低吸？

補記：與啟蒙前輩談此股，看法則有點保留，佢認為高寶成功開拓了化庄品市場，其實應該繼續發揚光大，卻去沾手再造能源，將來是否能夠為集團帶來盈利言之尚早，而前期投入資金必不少，反而成為了投資此股的隱憂。聽落前輩分析不無道理，又放了錢入嘉豪袋。

股東會

咁大個仔都未出席過股東會，不過呢個周三打算處女下海，去創富生物科技 (340) 個棚野超超，呢隻野今早又再發力，路邊社話仲有排去，嘉豪一於當儲老本，得閒又吸多少，所以更加要到場聽下報告矣。

後記：股東會場面竟然都幾熱鬧，似乎對呢隻變身股有寄望者唔少，本來過程平平淡淡，但臨尾超大 (0682) 主席郭浩自告奮勇以投資大好友身份發言，講到話佢估計此股三年後值 $20至 $100，雖然係幾誇張，不過即刻令全場人醒晒。郭先生演說中氣十足，加埋有股懾人氣勢，呢份魅力唔係咁容易學，誠猛人也！

二三線發力

個別我留意過一輪的三四線股，經上次五月創高位後回軟多時，其中包括中國稀土(0769)、華基光電(0155 ) 、津創環保(1065) 等，近周卻先後如睡獅甦醒反彈，睇落散戶終於開始手痕。可惜恆指公司並無設立細價股指數，無辦法從宏觀角度睇清楚近期細股走勢，否則可能係另一個恆指即將見頂明顯訊號。

初會黃興桂

上周六晚賽後節目錄映完畢，在朋友穿針引線下，首度與球壇奇人黃興桂兄碰上。
嘉豪絕少睇波，世界杯也僅看過決賽，講句實話，連黃興桂的旁述，也沒聽過幾多次，當然更無甚印象了，只是也道聽途說過那些「十二碼一係入、一係唔入。」、「門柱是守門員最佳朋友」獨門「金」句。
地點是桑拿內的休息室，大家談得份外「無牽無掛」，原來興桂兄經常星、港兩地走，幾乎每周都回來與家人朋友碰面，為ESPN工作以外，最佳娛樂便是越洋賭香港馬，還星、港彩池兩邊賭，擇賠率較高一邊落注。
勿以為興桂兄是個亂放厥詞的講波老，電視上直播著車路士的比賽，他能夠很快指出兩方對陣的部署，畢竟教練出身，懂得宏觀地看森林而非看樹木，新進的年輕旁述員，花十年八載也難培養這種火候，因為始終非紅褲子或經過認真訓練起步。
可惜香港傳媒從來不肯投資栽培人材，尤其評馬講波，根本只被視作兒戲範疇，但求人有我有，看 budget 遠比質素為緊，講得好聽是多給新人發展機會，說穿了不過是將貨就價，求其敷衍讀者或觀眾。

Now 有個絕佳概念

睇過CNN Money 對 Google 天價買 Youtube 分析，忽然想起依家 Now 呢個超越傳統電視之平台，確有唔少內在概念。
最簡單莫如賣廣告，假如能夠像 Google 般分開收集家庭各成員年齡喜好，對廣告商來講就可以按對象發放，男人老狗坐電視機前，就播桑拿、汽車內容，換個老人家睇肥皂劇，即可以改為靈芝孢子、風濕鐵打酒一類，兩小口加個初生BB，自然尿片、童裝係咁 sell，呢個先至係真正度身訂造「目標觀眾」概念。
對廣告商來講，用 viewed rate 定價自然更有吸引力，而且可望少咁D廣告時間觀眾上廁所密度，比傳統「打亂章」效率必然有所提升，唔知道小小超班謀臣有無諗到呢？

CNN Money: The real reason that Google bought YouTube?

氣憤馬迷來鴻

剛收到馬迷輝來信，洋洋千字，可見對賽馬屬心之心，責之切一族，嘉豪做個文抄公，在此公諸同好：

本人投注賽馬已逾20年...至今真忍無可忍!亦希望能向馬會反映!

現今之賽事越來越難投注!太多人為上因素顧慮...!馬匹實力易評估!馬匹狀態可看貴台節目!但人心就最難評估(尤以騎師...)，叫普羅大?馬迷怎放心投注!

★★★ 如果馬會真想提高投注額!首要提高“賽事過程之監察”....其實一字咁簡單→確保每個騎師真正盡力策騎馬匹過終點(尤以一些後列或受阻後馬匹...眼看很多騎師受阻後就老逢地按住過終點，真的沒法可更近)!

“盡力策騎”為何那麼重要(就馬迷角度而言)!
(一)可真正觀察到馬匹之“餘勢”(跑輸沒所謂)，作為下次投注時最大參考因素!在本人揀馬而言，馬匹餘力最為重要(狀態較次要)，馬匹餘力亦即代表馬匹之隱藏伸延能力及潛力。

舉例:上次動力金剛受阻後見杜利箂抽後再騎上僅負皇者(本人因而未能命中T，亦心甘命低!但最大分別是可看到動力金剛之餘勢之強，今次能反反先“紅皮柚及皇者”是可預測!其實上次動力金剛隔夜賠率之熱及當昨最後一刻落飛博失，亦可見有人(估幕後)自視甚高及損手!

(二)普羅馬迷輸錢後心甘命低!(亦即自已代表揀馬方式錯誤，要改!但如該馬未盡發揮，就難以評估是否自已問題...)。

★★★ 最難投注騎師“韋達”

舉例:昨晚見韋達(落飛)拼更奇妙(8檔)及雄威(12檔)，相當精彩!尾場就堅定不移地揀選大贏家作膽(上次大外耗力入內直路抽中檔稍騎即彈離贏，餘勢甚強!)拖真叻仔(上次太前兼早出頭)、五殼豐收(上次步速太慢兼未力騎，今次有過關飛兼最後時段落飛)、衝勁直前(當銳)、信寶(上次外疊望空跟跑)作三重彩及單T!誰知又中陷井!

疑點:
(一)上次“大贏家”前面同樣有兩匹馬放頭(步速偏快)，直路大贏家懂抽中檔上贏(最低限度馬匹是可以適應這方式策騎，而不減其威力)，而今次同樣有兩匹馬放頭(步速更偏慢LAST 23.0前領馬墮退機會不大，為何不抽中檔上)。

最可笑緊隨其後貼欄上之真叻仔、衝勁直前、五殼豐收通通都有位上!更可笑的是韋達不認識“湯智傑”是那個馬房見習生(方廄)!而最強對手是(方廄)真叻仔，湯智傑(直路衝仍長彊...兼望住韋達，更沒意識修正彊繩走直線，慢慢斜入內欄，他真會讓內欄予你上?而多屆“冠軍騎師韋達”真的不懂嗎?

再且受阻是近250多米，真的沒能力?位(韋達當時沒望外邊有冇位)再上收服失地(當時再後之五殼豐收亦可跑入Q)，即使未能收服失地，相信稍騎亦可得更佳名次甚至入位(大贏家沿途實在太輕鬆)。(很懷念蘇銘倫勝利飛駒受阻後即時抽身再上力壓同?冷門(不底出，亦令本人命中之三重彩派彩彩金減少不少，但依然佩服。就似動力金剛受阻後見杜利箂肯抽後再騎上之騎師實在太少、就連像“洗毅力騎滿高”洗毅力騎滿高之鎮定實在太少)!馬會所定之什麼盡力策騎...真的那麼難做到!該例似有實無地選擇性執行。


(二)個往類似韋達熱門受阻死火(共通點是最後沒落飛...)
季初“生猛情人”($23大熱)內欄受困後按住過終點(令本人用生猛情人拖上浦福星、加得勁、紅皮柚投注之T得個桔)。

上季尾“富貴玲龍”($24大熱)內欄受困後又按住過終點(令本人用富貴玲龍拖馬威力及勝德寶投注之T亦得個桔)。

上季亞視盃之終身美麗($20大熱)受阻第四...(全場馬迷?差)

其餘像今季之天仲之寶、自然好、精蝦王....受困阻按住過終點之鏡頭太多，一個騎那麼容易受困已是問題，我不想聽什麼手風不順等籍口，最想見的是受阻後去積極搵位上!唔係好黃鉆石望望腳便收工(事後馬匹竟冇事，韋達以為馬匹有事停策已不鮮見!如馬會真附予騎師那樣權力的話!相信本人20多年來那沉愛賽馬(幾乎沒一場不投注)亦會戒之大吉!!!!

(三)今季韋達大外檔遊馬可再出有表現之馬實在太多...!

真係贏 韋達騎後(換賴維銘兩次臨場落飛入Q)

過關博 士韋達騎後(換王志偉臨場落飛入Q)

金枕 韋達騎後(換戴勝臨場落Q飛入Q)

夠信心 韋達騎後(換巫斯儀臨場落飛飛入Q)...連小武士韋達騎後(換高雅志臨場落飛飛W，這或許是加程威力問題，本人不介意)

同樣特點是韋達騎輸後，臨場有誰那麼夠信心落飛博殺!難道“多屆冠軍韋達”是那麼差...還是....?

(四)韋達操後不騎馬匹有表現馬(我亦記不起有多匹...唉)!

心頭好、寶樹多盈....操後不騎換其他騎師等有表現(而自已揀之座騎就落敗)，真的希望是他揀錯!否則...

真的希望“香港賽馬能有光明之日”!(彩池實在太大!其實一些大熱門輸比贏還能得更多亦未定，像以前告氏兄弟、白德民、萬成...唉!或許是外圍幫太強之故吧!)

●●● 最後本人認為保障普羅大?馬迷投注之金錢才是最重要(輸錢沒問題!最緊要是
普羅大眾馬迷所投注之馬匹真是跑盡而輸!便可!)!

騎師應該盡力為普羅大眾馬迷爭取最佳利益是理所當然!並不是大外欄遊馬可或有意外後就按住....為求輸遠d!博減分(現今之評磅員不會那麼笨)或下次換來較佳賠率...等!


個人對馬會小小建議:

(一)每匹馬如改變跑法必須備案。

(二)加強罰則以對付未盡全力之騎師(尤以一些大師傅)

(三)馬會監察小組，加入一些專業人事(如評馬人、退休練馬師或騎師...等)

(四)每匹馬賽前必須通檢驗才可參賽(尤其是氣管，太多馬匹賽後有濃痰...等，馬匹回不到氣怎跑?)

(五)如用電話投注而彩金超過500萬不用致電馬會登記，直入其銀行戶口，尤其是六合彩(本人用投注寶買後就少對...)，君不見每年馬會有過億彩金無人認領!)，這樣搵笨措施可運作至今(相信很人是不知，連本人致電問馬會查詢用電話投注彩金超過500萬，須否登記!竟然一個話要另一個話不要之答案)

出手捕熊

上日提出打算周三買入國指熊證 #6228，因捱通宵後倒頭大睡，撐開眼已經是中午時份，結果美心嘆完茶後才施施然入市，以 $0.119 買入，比我預期近 $0.13 開倉低了接近一成，算是有點運氣。
畢竟是觀察了好一段時間才出手，我有相當信心這一注可獲不俗利潤。即管當係自我催眠，國指14天RSI 近半年來首度站於 70 以上，現報 74.4，處於超買狀態，而周三收市 7,441，已經拋離了250 天線達 17.5% 之遙，加上迫近五月初高位，料出現阻力機會不低。

後記：眼見周四恆指回軟，大手成交額更明顯增加，滿以為調整在後頭，豈料周五開市跳升，國指氣勢更盛，迅即衝破 7,500 點，縱使看短期有調整看法未「完全」動搖 (即係有少少啦！)，但堅持要自己習慣守紀律止蝕，所以於 $0.1 平了倉，損失了 15%，惟有等下次機會再臨。

國指熊 #6228 諗得過

執筆時為18號凌晨，美股杜指與標普回軟約0.5%，主要借PPI數據出貨，短期內係咪會跌得更深，暫時尚未明朗，但有個健康調整也正常。
港股是日先低後反彈，算硬淨，不過今次升浪中尚未出現三五百點小規模調整，借工行抽資跌一跌，應該較配合劇情。
估指數跌，我會買國指熊證，#6228收回價7,700點，比現指數高4%。現時國指極度超買，已經升離250天線達17%，比保力加通道上軸也超出接近1%。此外恆指相對國指現比率2.434倍，比250天比率2.536倍，國指偏強了多達4%，我估計可能有不少資金作出了「買國指/沽期指」套戥，一旦到時候拆倉，或雙雙向下調整的話，國指跌幅會比恆指更大。
#6228槓杆比率11倍多，上日收市溢價0.37%，拆合約 $0.005，算是相當合理。周三開市 $0.13以下價位買入，短線以10天線約7,240點套利，應值 $0.155，利潤20%；若用保力加通道中軸約7,140點套利，則值 $0.175，等於35%利潤。以15%止蝕，價位放 $0.11。

姓賴一族人間蒸發

今季投注額愈來愈勁，口痕友話新主席加老「應」腳頭好，按理兩位都唔係剛入馬會，莫非係要坐正時腳頭至有效力？
講到底，最主要功臣當然係「回扣」。其實馬場也有20/80法則，由20% 大戶負擔起80% 投注額，輸了有一成回水，對呢批十萬八萬上落者真係幾有效，買大D贏多D，輸左收番「回扣」夾疊又推大D，滾雪球效應就此顯現。
係咪成功打擊外圍莊家無人知，但近期尾兩場次次過億，好肯定係連外圍老也幫襯埋一份，事關當跑到第五、六場殺夠左皮，畀你做莊都寧願轉晒D風險落馬會，好過由賺變蝕得個吉喇。
投注額低迷時候，姓賴行家都走出來指手畫腳，話監察唔嚴影響馬迷意慾。事實又係咪咁呢？我並唔覺得今時競賽小組同去季有乜唔同，而且昔日上海幫做馬案年代，投注額都係連年上升，咁以前咪監察得好嚴？依家班賴氏一族突然收晒口咯，乜野叫做看風駛里你識唔識？

南莊好運一切順利

Blog友Simon話，心水冷門係「有聲氣」，此馬去季出盡法寶也無法贏，蘇銘倫、冼毅力、杜利萊騎無一例外，今季依然好認真打磨，但先後由高雅志、冼毅力摸完才跌入冼文諾手，實在難樂觀。
先唔講馬，冼文諾對谷中跑道特性始終陌生，而且澳門賽事騎師走三、四疊家常便飯，唔係咁容易一下子改變習慣，除非有20倍以上喇，否則連打水片價值也欠奉。
其實同場「鷹隼」上次終點前出步幾凶悍，如今早段落腳很慢，重戴眼罩應該有助守個好位，高雅志無了東尼仔做後台成績大退，唔會唔心急交代，選騎此馬應無揀錯。
全晚心水第二場，應該係「南莊好運」、「一切順利」對撼，估計步速唔快，對可以守前列「南莊好運」會較有利，T腳不外乎「愛得威」、「更奇妙」、「光速」，本來「天下無雙」上仗跟住「叻百利」衝前姿態唔曳，但又係冼文諾外檔，這一注可以慳番卦！

銀袋日心水冷門

愈來愈愛上寫Blog，甚至於多過正規寫馬仔貼士稿，事關題材開揚廣闊，字數又無限制，可以 100% 做到我手寫我心。
由於周日跑馬，周六衝刺特別忙，今晚收了工還要到一到別人 Birthday Party，無上新料請看官原諒。
今次跑婦女銀袋，贊助商莎莎老細件終身美麗轉告東尼 stable 後初次披甲，呢隻明星馬當然係公眾大熱門，若果從我睇馬角度推算，隻馬會跑得好近，但未十足弗加上讓磅，Win 就唔多捧得過。
有件心水冷門在尾場，為 10 號仔駿冠，計佢澳洲賽績三班輕磅好有利，香港木球會名下馬向來少有入錯貨，事關曾有件西報猛人 Turnbull 做團體經理，佢同好多鬼老騎師好老友，而且線眼遍布國際，估計有十多倍，小注 WP 如何?

客觀 持平！？

身在傳媒逾二十年 (只因早入行，唔好當我老！)，在電視上講馬也十年了，出鏡不久已經開始主持現場賽後節目，還要接聽觀眾電話。有人以為講馬老易做，假如讓你坐上去攝影機前，便知道真正需要靠功力駕馭，既唔能夠dead air細想答案，卻又唔能夠模梭兩可，更唔能夠亂嗡講錯話。
常說擔任評論崗位，最重要是客觀與持平，意即要講公道說話。問題是，甚麼才算「公道」，大眾眼中的公道，不等同專業人士眼中的公道，所謂觀點與角度不同，不同人看同一件事，結果可以差異很大。
最莫名其妙是今時今日的「即炒」民意方式，發生了事，無論新聞節目或報章雜誌，總愛附上市民正反意見，一個說點解要支持，另一個說點解要反對，如果這樣便叫做客觀持平，那報不報道民意又有何相干？
稍負責任的報導，則會加上一百幾十人的「民意」調查，但有時不同機構的調查，結果卻又可以差距頗大，始終彼此立場不同嘛，「東」記有「東」記民意，「生果」有「生果」民意，所以又係唔知應該信邊瓣。
你或者會話：喂，你自己用個腦諗下，分析一下，唔好樣樣要人講你知好唔好？
好唔係唔好，但係世界咁大，我咁渺小，真係好多野都唔識唔明白，如果我諗下就知道真相係點，咁早就做左報館老總，又或者乜乜顧問物物專家喇。
好彩我只係個講馬老，仲係一早聲明只講自己心目中睇法，唔理會係咪客觀持平o既講馬老，否則碗飯必更加難哽。

掘沙隨想

「網」間蒸發了兩天，早預告會作掘「沙」之行，今回總算執多少，唔洗付出娛樂費，於願足矣！
金沙頂層中菜做得不錯，這晚吃著嫩滑炸子雞，眼觀對面牆壁的大酒埕，分四排橫列，上兩行各九個、下兩行各八個，合行三十四埕，並貼上唔同筆法的「酒」字，不斷思索究竟屬甚麼風水陣？可惜對術數風水從無興趣，木宰羊。
自從引入競爭，澳門街賭場多過米鋪，因中午在利澳飲茶，順道繞了賭場一圈，人影相當冷清，金沙則不論早晚人頭湧湧，將來還有海島市大場相繼開幕，濠賭股縱有概念，汰弱留強卻屬必然，沾手這瓣隨時中招，切記小心！
澳門原居民不足百萬，賭場荷官月入近二萬，對主要勞動人口來說，吸引力無法抗拒，尤其是年輕一群，除非家人極力反對，試問誰還有興趣於別行由低做起？更不要忘記，過多三數年通帳持續上升(現時的士牌價已逾五百萬)，賭業加深了人民收入斷層後，一般小市民生活會更加難捱，如何解決這個嚴重社會問題，將是澳門政府之重大考驗。
問的士司機大哥如何面對飛升物價，方法就是走到珠海消費，吃喝玩樂平番一半，總算是小市民的一個理想選擇，看來投資珠海樓舖，此階段還有水位。
嘉豪老媽子醒目，兩年多前走到澳門買樓，入伙前售出，不足二百萬元單位，袋了近百粒離場，獲利不遜其倫敦房產投資，因後者業主要付出不少雜項費用，放租樓宇連睡床被鋪都要包埋，還要考慮匯價風險，七除八扣隨時少左一大橛。
回說濠江，有時間會做下功課，看看是否有銀行業股值得買入，畢竟社會富裕起來，必先益了銀行老。

賭纜維生

周三無夜馬跑，嘉豪本周淨係朝早睇晨操，寫幾百字稿，便完成一天工作，當然好疏乎。
閒時間多著，心思思又想過濠江玩兩手。我特別鐘情金沙，事關地方大賭台多，一百蚊有交易，仲可以四圍坐慢慢玩，同以往幫襯「新公司」感覺差天共地，所以幾年絕跡娛樂場後，手癮又重新萌芽。
上個月到過一次，才發現原來有人賭纜維生，佢地下注百家樂會莊閒齊買，一百蚊買莊，閒則一百三，換言之實賭三十蚊一口。究竟係咪搵到食，我無機會向事主採訪，但相信亦總會有成功者。
一般人以為賭纜輸一買二、輸二買四，其實係謬誤；真正賭纜，應該係輸一買三、輸三買七，方程式為 A=(Ax2)+1。因為用此方式夾疊，賭多一口贏多一口，第三關買中贏三注，第八關才買中便贏八注！
理論上只要有足夠本錢，又唔超過賭桌限紅，賭纜確係立於不敗之地。不過假如真係無風險，豈不可以出糧請個伙記開工，叫佢一日八小時依足條纜落注，甚至足不出戶於網上賭場開工？世間上當無如斯便宜之事罷。
行文至此，又有點手痕，若這兩天未見更新文章，到金沙找小弟可也！

炒友廝殺錄

嘉豪有位朋友，姑稱他為炒友Ｈ，炒友Ｈ年紀輕輕而擅理財，乘「沙士」時睇準入市掃樓掃股，已經積落相當身家，近年晉身業餘炒友行列，閒來吹水吐露炒經，教我聽得津津有味。
炒友Ｈ近期傑作係谷起某變身股，三個月間由兩粒神推到個幾銀錢。炒友Ｈ語小弟，佢地唔係立亂喳起鑊鏟就郁手，而係搭準晒天地線，查清楚來龍去脈，知道唔係吹水料至會開車，否則唔小心搭了賊船，到時唔使慌有得甩身。
講到炒作過程，更加值得大家參考，因為可以借鏡作為將來入市經驗。據炒友Ｈ講，佢地兩粒神時開始猛吸貨，為免打草驚蛇，同埋要引散戶低價就範，買完便會即刻掛高兩三格「責」住，營造有大量沽盤驚嚇場面，日日係咁「責」係咁「吸」，幾下手勢已經震晒Ｄ睇排隊買賣散仔出局。
到中段吸夠平貨開車，就要進入同真正莊家鬥法階段，事關人地有個配股價範圍，唔能夠畀隻野舞得過高，此時就要借力打力，先營造交投急增環境，引起其他炒友及散戶注意，然後長期掛低兩三格擺放大額買盤「托」住，驅使其他欲買貨者搶前現價成交，慢慢消耗莊家貨源。
到最後開車衝刺階段，炒友Ｈ謂此時最驚心動魄，事關要紏集市場力量，全力挑戰莊家底線，見「位」踢「位」不容退縮，否則散戶隨時散水，到時便變得為他人作嫁，搭完棚自己無機會落車。此所以該股曾有一周每天標升，升幅榜日日企十大，迫使真正莊家縮手唔敢亂沽，幾個開升幅就此成功搶灘。

話當年新報入行

嘉豪85年《新報》入行，之前在老父廣告公司工作，靠一封自薦信，晚上開始兼職替馬恩賜跑腿，做得兩三個月，始轉為全職工作。當時報社馬經版「仝人」原本僅得編輯一位，名字喚張明，行外人當然不識，但提到其筆名「快活公子」，老一輩馬迷當還有印象。由於我的加入，馬經版人手立即「倍增」，當時美其名擔任助理編輯，實質是跟頭跟尾跑腿一名，加上當年還未有傳真機，每天嘉豪都要先到灣仔收取各馬評家稿件，然後才返石塘咀報社。
《新報》為首家以電腦植字排版的報章，嘉豪則剛好經歷轉折階段，因初入行時還是用鉛字粒，那時候下午三至五時發稿，等到八時左右睇初辦，中段無事可做，最佳消閒方法是走進排字房。勿以為我好學，其實是做塘邊鶴，因晚飯後例有牌局，由字房大老主持「十三張」，當時每門每注動輒一千幾百，上落兩三萬平常事，嘉豪當然無乜實力，偶爾跟一百蚊「油菜」執多少，第日就會走去畢打街Polo買馬球衫獎勵自己，每件盛惠一百七，都咪話唔肉刺。
講番馬恩賜，當年算係新一代馬評家，但唔多人知此筆名其實「一賣開三」，除了大家所知後來港台拍驃叔開咪，即帶嘉豪入行那位馬恩賜外，還有張福元同Ｑ仔，後者則不彈「馬」調久矣，不久前曾在某場合碰上，才悉早已投身政界，擔當幕後軍師。
馬恩賜當年首位提倡「賽馬投資」，論馬講步速、計數據，完全不理會晨課狀態，曾經成為萬千年輕馬迷偶象，並奠下了今日評馬界新思維的基石。

東亞(23)服務差半條街

東亞銀行(23)近期升勢凌厲，此為嘉豪主要往來銀行之一，作為其客仔，對其服務質素卻未敢恭維，若用畢菲特選股方式，都幾難吸引小弟捧場。
近期兩單事例可以借鏡，嘉豪向來倚賴網上戶口買賣股票，某天分兩注吸納同一number，早上先從網上買進，下午則因未能上網，改用電話落單，一心以為同日交易，手續費會合埋計算，豈料收到通知單一看，兩單交易皆獨立計算最低手續費，分別為$80及$100大元。
我最後飽覽了所有有關其股票交易條文，根本並無一條列明網上與電話落單，需視作兩項不同交易處理，幾經交涉之下，總算為自己爭取回多付的手續費，更建議有關方面應加入提示，免其他客人也因誤會而多付手續費，結果相隔了接近兩個月，始終未見有作出警示行動。
另一單為去周恆指熊證#6222觸及回收價停止交收，翌日嘉豪致電查詢剩餘價值，經紀答覆如下：暫未收到通知，不過有都好少錢o者，使唔使我畀個發行商電話你打去問？
三句說話，頭同尾兩句都無問題，中間卻要加句"有都好少錢"，其一顯示其信口開河唔專業，其二你又知客戶買多少？幾個仙股價若乘以十球八球，都唔算少錢吧。
我同時也有採用匯豐恆生的服務，兩行職員的專業程度，東亞實在差了半條街。

乜姐開倉

股票「貼士」欄，最常見係擺一大舊錢，然後教人買乜買物，期期計數賺幾多幾多，個個都自認第一倉，扮超人打救世人。
有位乜姐，專職開咪寸爆問number阿叔阿嬸，《經濟X周》中開左個倉，本來搵啖食，寫乜都無所謂，信唔信貴客自理，問題係佢計數手法唔乾淨，依樣野就一定要講講。
去周第1300期，該欄指出於9月25日開市，以$0.209買進十萬股華凌(382) ，然後翌日開市價$0.255放出，為基金賺了$4,600大元。睇得咁準，本來可喜可賀，但若細閱此投資欄末端，可發現有句聲明，指出持股以上落5%為止賺及止蝕；以此作據，$0.209買進，應該$0.23平倉食糊，查(382) 於入貨日最高價$0.239，早已觸及止賺價，緣何會以翌日更高價賣出？
剃人頭者，人亦剃其頭。如此操守，憑甚麼去扮正義？

真實慌言

昨晚從ATV睇了港台《傳媒春秋》，是期節目名「真實慌言」，主打係講南韓國營電視台MBC節目，大膽揭發南韓科學家黃禹錫所發表，有關人類胚胎幹細胞的論文做假，從而帶出背後編輯自主的重要訊息。刻下港府正檢討公營廣播問題，《傳媒春秋》際此敏感時刻推出上述報道，更一連五輯大鑼大鼓，是否純屬巧合？
嘉豪無疑只是講馬老一名，骨子裡其實也有點傳媒使命感，最初馬會斟介從Cable回巢時，第一項關心便是言論會否因「官方」身分受制。如今主持有關節目四季多，尚幸一直順風順水，縱使收到風高層開檢討會時，仍有其他部門阿頭，質疑何以「官方」節目也不留餘地批評自己機構，總算自己阿頭夠硬淨，未嘗面對過收口「勸喻」，能夠一直保持節目內容獨立性。
眼見有些同業係又鬧唔係又鬧，扮晒公眾代言人，實質是指鹿為馬嘩眾取寵；又有部分盡心盡力施展媚功，為有私交之騎練貼金唱好，以博取其他方面利益，上述以公器作私器卑劣行為，看在嘉豪眼中實在作嘔，可惜人微言輕，欲改變風氣談何容易。
看過一次左丁山寫股壇長毛，讚其夠膽隨時發炮不懼權貴，但也道出了先要自強唔需要睇人面口搵食之大前題。想到人生中有時候確要向現實低頭，保障了家人三餐無憂，自然便海闊天高任我行，所以更加努力鞭策自己學好投資，願共勉之。

馬場上的市場異動

股票市場上的異動，如破位向上、成交增加，每每是值得跟隨買入的訊號，尤其對短炒客而言，這甚至比基本因素更為重要。馬場裡也不乏跟電算機搵食的投注人，見賠率有異動便飛身撲入，因為他們解讀這為內幕貼士，以為追隨大戶錢、smart money 贏面必高。
股價升跌完全由供求決定，多人買股價便向上，睇股價機跳動搵食，只要行動夠快、轉身及時，搵餐茶錢唔係困難，特別係昔日未收窄中價股差價時，好多即日鮮客都係靠此法賺錢。
跑馬卻要馬兒第一匹先過終點，就算幕後落重飛，也不代表可以跑贏其他對手。我為了應付暑期口水稿，經常會為賠率變化馬匹做表現統計，結果係落飛還落飛，唔見得表現會特別標青。
根本在現行緊湊讓磅賽制之下，馬匹機會拉得很平均，冠、亞軍馬勝負距離，有半數是在半個身位以內，加上監察得緊、獎金又高，整古做怪的行為少之又少，多數人打真軍之下，就算練馬師睇好騎師肯搏命，勝算也不過略高而已。
此所以，跟風賭落飛馬其實是搵自己笨，想在馬場贏錢，其實應該做足基本功課，以賠率偏高的有分頭馬為主要下注對象。

蚊髀同牛髀

周四恆指開市裂口升破 17,800，觸發了熊證荷銀 #6234(17,700點收回)及德銀 #6222(17,800點收回)立即停止進行交易，並退回內在值餘額給投資者。
兩證行使價同為 18,200 點，轉換比率 5000/1，理論上退回投資者費用應相若，事實上差異卻是蚊髀同牛髀，#6234 退回每手(10,000份)$756，#6222則退回$519.02，前者高出多達 45.66%。
竅妙原來在彼此結算價大有差異，荷銀以恆指 17,822 點結算，德銀則用當日最高位 17,940.49，相距達 118 點。甚麼為肉在粘板上，觀德銀處理此事手法可知；至於荷銀如此厚對顧客，是否因該證街貨量微乎其微，所以賣大飽當作宣傳伎倆，它日自有分曉。
其實牛熊證原應有兩類，(N)證無剩餘價值，賺蝕一目了然，(R)證則到收回價後尚要待發行商計數回水。只是市場上僅得兩隻(N)證發行，分別為 #6901匯豐瑞銀牛及 #6902和黃瑞銀牛，至於有關恆國指資產，至今從未有發行商提供，是否說明了發行商們已經聯手起來，存心只做這種打死狗講價生意？
所謂逢商必奸，然乎？

馬圈內幕貼士準

睇完標題，梗係覺得馬評人成日收埋自己中，仲唔知衰係度晒命。
嘉豪都時不時收到內幕料，不過講穿了，準o既並唔係賽馬貼士，依家野多數生埃，尤其若係馬主放出，更加可以不理，至於練馬師料，有時確會問下我地意見，但綜合計唔聽好過聽。好似嘉豪咁，就更加謝絕賽前與圈中人談馬，一來怕被影響思路，二來聽了貼出來好似爆人內幕，所以都會避忌，反而賽後有唔明白，由於已經無利害衝突，就無妨傾多兩句。
又話收料準，又話唔好信，究竟嘉豪係咪精神分裂？非也，我所謂貼士準，係講炒股貼士。話晒馬會會員皆中產以上，唔少更係上市公司話事人，佢地畀出來 number 多少有點分量。唔使講得遠，年內兩隻神仙股意馬(585)同創富生物(340)，馬圈中都有唔少人受惠，連班記者仔記者妹唔少都搭到順風車，攪到個個都話炒股好過賭馬。
前事講完，不過好似事後孔明，牙痛文學寫出來大家唔會受惠。嘉豪當然唔想做犯眾僧，近期又聽到一隻(3xx)，依隻毫子股上個月突然標高成倍，但出便世界完全無風吹，近周又靜返下來，據知想壓住收多少貨，收風有件好野等注入，此股上市才三年，專做Ｄ下欄野，主席持股70%，街貨乘埋值唔夠一億銀紙，遲多少一郁起手，隨時係第二隻(340)。夠慧根者，不妨估下係邊隻，費事公開唱人好事，估完在 comments 欄留個答案同電郵址，周日得閒話你知有無估錯。

入馬場賭單雙大細？戇居！

馬會今季推行大戶回扣後，對投注額略有幫助，尤其尾場賽事接連錄得過億彩池，初步效果應算不俗了。
暫時仍未有推新彩池跡象，假使要推，有人曾提議玩大細，單雙等仿骰寶方式。我覺得說者從沒有用腦思考，因為要分辨單雙還是大細佔優，不同樣要費神刨足全場各駒？這對於簡化賽馬複雜性有何幫助？至於若有人喜歡純碰運氣亂買，該類人便寧願走到賭場去，畢竟半個小時才跑一場馬，在連等開番攤也嫌慢的賭仔眼中，自然毫無吸引力。
推新彩池，又要簡化選馬，最初我提出了把幾匹同場馬括弧對名次，先對手過終點便為勝的簡單賭法，有關方面已經採納研究。最近又給我想到另一款，因已經寫了在下周一 apple 專欄內，惟有先賣個關子。

幻海奇情

早兩日見到報章全版廣告，招攬賣賽馬貼士，並聲明每場僅一注投注，累積可贏多少云云。
年輕時睇幻海奇情，某集內容是某人突然有了預知一天事的能力，結局好像是他預知自己會因車禍離世，以為能夠躲藏在家而改變命運，結果因誤踏中玩具車跌死。看過上述劇集後，時不時發同一個白日夢，希望能預知一天事，富貴千萬年，馬仔炒股過大海逢買必中。
不過嘉豪算是比較有計畫之人，已經想定下一步，如何能夠掩飾好預知能力，不致通了天被送去醫大作科研對象，或者終生被禁止進入賭場。
若果有僅需一注投注便贏大錢的貼士，我便不會蠢到公開招收會員了，買十蚊變一百，買一百變一千，容乜易成個馬會彩池畀我捧晒？
p.s.附上家中三位公主遠照(遠者，非近也)，左起 Poppy, Jolly, Bunny.

恆國指牛熊證收回價公平值

坐言起行，立即計算出所有現時交易中牛熊證收回價公平值，以方便將來參考。此公平值並未包括財務費用(即溢價)回扣，另要注意計算實際價格時，因並非以收回價作最終價，所以需多預大約一成左右差距，主要視乎不同槓杆比率而定。
恆指牛證
編號 類型 行使價 收回價 到期日 比率 公平值
6237 牛證 16600 17000 2007/3/29 5000 $0.080
6225 牛證 16400 16800 2007/2/27 5000 $0.080
6236 牛證 16300 16600 2007/3/29 5000 $0.060
6235 牛證 16100 16500 2007/3/29 5000 $0.080
6220 牛證 16100 16400 2007/2/27 5990 $0.0501
6230 牛證 15800 16300 2007/2/27 6990 $0.0715
6218 牛證 15600 16000 2007/2/27 5000 $0.080
6210 牛證 14800 15100 2006/12/28 5000 $0.060
6219 牛證 14500 15000 2007/1/30 6990 $0.0715
6201 牛證 14500 15000 2006/12/28 5000 $0.100
6206 牛證 14200 14600 2006/12/28 5000 $0.080
6207 牛證 13800 14300 2006/12/28 9000 $0.0556
6200 牛證 13500 14000 2006/11/29 10000 $0.050
國指牛證
6232 牛證 5800 6100 2007/3/29 5000 $0.060
6212 牛證 5500 5800 2006/12/28 5000 $0.060
6215 牛證 5300 5600 2007/1/30 5000 $0.060
6213 牛證 4500 4800 2006/12/28 10000 $0.030
恆指熊證
6233 熊證 18200 17900 2007/3/29 5990 $0.0501
6223 熊證 18500 18000 2007/1/30 5990 $0.0835
6229 熊證 18600 18200 2007/2/27 5000 $0.080
6224 熊證 18600 18300 2007/2/27 5990 $0.0501
6226 熊證 18850 18350 2007/3/29 10000 $0.050
6216 熊證 19000 18500 2006/12/28 6990 $0.0715
6227 熊證 19150 18650 2007/1/30 10000 $0.05
國指熊證
6228 熊證 8000 7700 2007/3/29 5000 $0.060
6231 熊證 8200 7700 2007/1/30 5000 $0.100
6221 熊證 8200 7900 2007/2/27 5000 $0.060
6217 熊證 9000 8500 2006/12/28 8000 $0.0625

我喜歡周日跑馬

依度係嘉豪私人空間，唔需要理會公眾想法，所以以下意見純粹個人，大家唔同意都係咁話。
馬會愈來愈多編排周日跑馬，我明白好多人視之為家庭日，但作為講馬老，日賽出足有成 140 匹馬，如果得一日時間去刨(因傳媒早一天截稿及做貼士節目)，實在無可能應付得來。
你會話，o車，藉口o者，畀多日你貼士都唔準o架啦。無錯，因為貼士準唔準係講彩數，但係我覺得講馬老最大責任並非貼士準，而係要為馬迷找出值得參考的意見，譬如那匹馬狀態有上落，或者之前賽事中未能或過份反映實力，然後留待馬迷自行判斷取捨。此所以，嘉豪從來唔會為貼士得失而耿耿於懷，贏固喜敗亦欣然，蓋自知已經交足了功夫，問題係當周六跑馬時，通常都難有時間再三檢視錯漏，就會覺得並未盡克己責。

遲了二十年的對話

早兩日與多年不見的曾廣標兄茶聚，才發覺我倆雖然早在二十年前當過同事，卻方首次坐下來對談。
以前小弟不過是件花靚，Peter已經貴為國際版主管，就算有機會吹水，相信也話不投機。今天則身份大不同了，並非指嘉豪已經叫做馬評家，而是因小弟新近加進了股民行列(真係瘀，逾40歲才第一次買股票，今年三月才有生平第一個股票戶口，更是穩穩陣陣幫襯銀行)，面對這位騎牆大師(唔係指性格，係講識見)，自然份外覺得投契。
話晒今時今日見過下世面，嘉豪當然唔會淨係帶隻耳去見人，怕齋 gain 唔 give 以後無交易，索完一輪批股心法，又交番多少馬圈碎聞，Peter 出雞我出鼓油，咁至整到味正菜出來者。
唉，真要歎句以前少不更事，錯過了大段可累積財富日子，如今個頭漸近，才明白必須投資累積財富的道理，假如早二十年有過與曾兄一夕對話，會否已經印印腳打風流工過活？惟有反覆自我催眠：未為晚也，未為晚也．．．

黑暗時段的交易奇景

周三晚美杜指及標普齊創六年新高，周四早市日股升逾200點，對當時持有最熱炒熊證#6222的人來說，幾可肯定甫開市該證便會觸及收回價17,800，結果市前競價時段(09:30-09:45)出現了爭相降價求售奇景。
說奇景，是想不到此證基本上 100% 開市後便即宣告死亡，竟然仍可產生了 $353,000 成交(包括正式開市後已死亡時段)，根據我的記錄，競價時段最後一刻，於$0.06價位，合共掛出了 1.8M買 及 2.3M賣盤，究竟掛入買此證者，是否明白開市第一秒，聯交所便會即時停止其買賣?
執筆時德銀尚未公布發還的金額多少，至於賣方願意以 $0.06 售出此證，究竟是否明白其內在值是多少，因縱使以恆指 17,800 點計價，#6222 內在值應為 $0.08 ，再加上提早回收還有剩餘財務價值，$0.06 相等於把資產賤賣，因為縱使以恆指 17,900 點計價，此證內在值也已經是 $0.06，以該價買入者，將可賺取到剩餘財務價值，換言之是做了包賺生意；假如對盤時段掛買盤入貨者，其實早便計到這條數，他們的醒目程度很值得我們學習，而且到下次又有牛熊證貼近收回價時，應記緊準備好去做同類包賺無賠的買賣。

補記：德銀食水深，此證最後每手回水不足$520，換言之買入者未計手續費已蝕逾 13%，還要資金被鎖住近一周時間，死未？

高陽科技(0818)值26億?

偶爾看到此股中期業績，2006年上半年營業額193M，溢利42M。其中電子支付產品及服務增長甚速，由上一年48M增至83M，此部分錄得利潤15M，主要由於銀聯信用卡使用額大幅增長，明顯因國內消費急速上升及更廣泛採用電子貨幣受惠。我相信此方面邊際利潤應該頗高，就算以可獲20%純利計算，假使初期信用卡使用額能維持平均50%年增率，三年後此部分業務可達600M，帶來純利便逾100M。
此股2005年高低位(經調整)為$0.378及$0.078，2006年為$1.58及$0.308，以今年最高位計，市值為2,607M。
三大股東持股共69.15%，公眾持股509M，應該有足夠流通量，但6至9月份每日平均成交量僅1.16M, 2M及3M，貨源並不多，可能已有其他股東持有不放。
公司方於上年度由虧轉盈，有國內增長概念無疑，但預期2006全年所賺頂多100M，即現價預期P/E 24倍(現價$1.48)，看來是由於供求關係，開始炒過籠了。不過假使遇調整回到50日線附近，即$1.15至$1.2左右，屆時預期P/E回落至20倍以下，尚可考慮分注作小量吸納。